ഇരിക്കും കൊമ്പ് മുറിച്ച് ട്രംപ്; ഈ യുദ്ധം സ്വന്തം ജനത്തിനു നേരെ; ‘സോഫ്റ്റ് പവറും’ നഷ്ടമാകും; ‘അറിവില്ലാതെ’ അമേരിക്ക അപകടത്തിലേക്ക്...?

അധികാരത്തിലിരുന്ന ആദ്യ ഊഴത്തില്‍ താന്‍ ഒരു യുദ്ധത്തിനും തിരികൊളുത്തിയില്ല എന്നു തിരഞ്ഞെടുപ്പ്‌ പ്രചാരണവേളയില്‍ വലിയ അഭിമാനത്തോടെ പറഞ്ഞിരുന്ന വ്യക്തിയാണ്‌ യുഎസ് പ്രസിഡന്റ് ഡോണള്‍ഡ്‌ ട്രംപ്‌. എന്നാല്‍ തന്റെ രണ്ടാമൂഴത്തില്‍ കഴിയുന്നത്ര ശത്രുക്കളെ സൃഷ്ടിക്കുക എന്ന ഉദ്ദേശത്തോടെയാണ്‌ അധികാരമേറ്റതെന്ന്‌ തോന്നിക്കുന്ന രീതിയിലുള്ള നടപടികള്‍ അദ്ദേഹത്തിന്റെ ഭാഗത്തുനിന്ന് ഉണ്ടാകുന്നുണ്ട്‌. കാലാകാലങ്ങളായി അമേരിക്കയുടെ സുഹൃത്തുക്കളായി കൂടെ നിന്ന യൂറോപ്പിലെ സഖ്യ രാജ്യങ്ങളെ വെറുപ്പിക്കുന്നതും ഹൂതികളെ ഒതുക്കാന്‍ അവർക്കു നേരെ ബോംബ്‌ വര്‍ഷിക്കുന്നതും കാനഡ അമേരിക്കയുടെ ഭാഗമാകണമെന്ന്‌ പറഞ്ഞ് ആ രാഷ്ട്രത്തെയും അവിടുത്തെ ജനങ്ങളെയും അപമാനിക്കുന്നതും വൈറ്റ്‌ഹൗസില്‍ തന്നെ കാണാൻ വന്ന യുക്രെയ്ൻ പ്രസിഡന്റ് വൊളോഡിമിർ സെലെന്‍സ്കിയോട്‌ മോശമായി പെരുമാറിയതും എല്ലാം ഇതിന്റെ ദൃഷ്ടാന്തങ്ങളാണ്‌. എന്നാല്‍ രാജ്യത്തിനു പുറത്തുള്ളതിനേക്കാള്‍ വിദ്വേഷത്തോടെയാണ്‌ അദ്ദേഹം അമേരിക്കയുടെ അകത്തുള്ള ജനങ്ങളോടും സ്ഥാപനങ്ങളോടും പെരുമാറുന്നതെന്ന്‌ പലപ്പോഴും തോന്നാറുണ്ട്‌. അമേരിക്കന്‍ ജനതയുടെ മേല്‍