പേടിച്ചത് ഭരണമാറ്റം, ഇന്ദിരയെ നിർബന്ധിച്ചവരിൽ സഞ്ജയ് ഗാന്ധിയും; ആക്കംകൂട്ടി ‘ജനമുന്നേറ്റം’; അരക്ഷിതബോധം കൊണ്ടുവന്ന അടിയന്തരാവസ്ഥ

അൻപതുകൊല്ലം മുൻപുള്ള ആ രാത്രി. നഗരത്തിൽ അനിഷ്ടസംഭവങ്ങൾ ഉണ്ടായിട്ടുണ്ടോയെന്ന് അന്വേഷിച്ച് ഡൽഹിയിലെ പാർലമെന്റ് സ്ട്രീറ്റ് പൊലീസ് സ്റ്റേഷനിലെത്തിയ രണ്ടു സിറ്റി റിപ്പോർട്ടർമാർ പകച്ചുപോയി. ഏതാനും മണിക്കൂർമുൻപു രാംലീല മൈതാനത്ത് ജനലക്ഷങ്ങളെ അഭിസംബോധനചെയ്ത ആരാധ്യജനനേതാവും സ്വാതന്ത്ര്യസമരസേനാനിയുമായ ജയപ്രകാശ് നാരായനെ അതാ അറസ്റ്റ് ചെയ്തുകൊണ്ടുവരുന്നു. ജെപിയുടെ അടുത്ത് ഓടിയെത്തിയ അവർ കാര്യം ആരാഞ്ഞു. ‘വിനാശകാലേ വിപരീതബുദ്ധി’– അതായിരുന്നു മറുപടി. രാജ്യത്ത് അടിയന്തരാവസ്ഥ പ്രഖ്യാപിച്ചു, മൗലികാവകാശങ്ങൾ സസ്പെൻഡ് ചെയ്തു, പ്രതിപക്ഷനേതാക്കളെയും ഭരണകൂടത്തിന്റെ വിമർശകരെയും അറസ്റ്റ് ചെയ്തുകൊണ്ടിരിക്കുന്നു എന്നൊക്കെ അപ്പോഴാണവർ അറിഞ്ഞത്.