വിജയക്കുതിപ്പിൽ ‘ഹിറ്റ് മാൻ’; എറിഞ്ഞിട്ട് ബുമ്ര–പാണ്ഡ്യ സഖ്യം; കോലിയെ മറികടക്കാൻ ഇനി രണ്ടേ രണ്ടു റൺ!

എല്ലാ അനുകൂലഘടകങ്ങളും എതിരായിരുന്നിട്ടും വിജയത്തിന്റെ ‘ഗ്രാൻഡ് ഓപ്പണിങ്ങു’മായാണ് ട്വന്റി ട്വന്റി വേൾഡ്കപ്പിൽ ഇന്ത്യയുടെ വിജയത്തുടക്കം. വിജയലക്ഷ്യം നൂറിൽ താഴെയായിരുന്നിട്ടും അത്ര എളുപ്പമായിരുന്നില്ല പിച്ച് തുണയ്ക്കാത്ത നാസോ ക്രിക്കറ്റ് സ്റ്റേഡിയത്തിൽ ജയിച്ചു കയറുകയെന്നത്. ആദ്യം ബാറ്റ് ചെയ്ത അയർലൻഡ് 16 ഓവറിൽ 96 റൺസിന് പുറത്തായപ്പോൾ 12.2 ഓവറിൽ 2 വിക്കറ്റ് നഷ്ടത്തിൽ ഇന്ത്യ ലക്ഷ്യം കണ്ടു. കരുത്തായത് ദുഷ്കരമായ പിച്ചിൽ നായകൻ രോഹിത് ശർമയെടുത്ത അർധ സെഞ്ചറിയും. ആദ്യ മത്സരം അവസാനിക്കുന്നതും റെക്കോർഡ് നേട്ടങ്ങളോടെയാണ്.