എസ്ബിഐ ഡെബിറ്റ് കാർഡിൽ നിന്നും കൂടുതൽ പണം പിൻവലിക്കാം​

പൊതമേഖലാ ബാങ്കായ എസ് ബി ഐ ഡെബിറ്റ് കാര്‍ഡുകളിലൂടെ ഒരു ദിവസം പിന്‍വലിക്കാവുന്ന കുറഞ്ഞ തുക 20,000 രൂപയാക്കി. വ്യത്യസ്ത വിഭാഗങ്ങളനുസരിച്ച്് 20,000 രൂപ മുതല്‍ ഒരു ലക്ഷം രൂപ വരെ വിവിധ കാര്‍ഡുകളിലൂടെ ഇങ്ങനെ പിന്‍വലിക്കാം.

8 സൗജന്യ എടിഎം ഇടപാടുകള്‍

പണം പിന്‍വലിക്കുന്നതിനുള്ള വിവിധ പരിധിയിലുള്ള ഏഴ് തരം കാര്‍ഡുകള്‍  എസ് ബി ഐ ഉപഭോക്താക്കള്‍ക്ക് നല്‍കുന്നുണ്ട്. ഒരോ ഉപഭോക്താക്കളുടെയും വരുമാനവും മറ്റു ഘടകങ്ങളും പരിഗണിച്ചാണ് ഇത്തരം കാര്‍ഡുകള്‍ നല്‍കുന്നത്. കാര്‍ഡിന്റെ വേരിയന്റ് അനുസരിച്ച് പ്രതിദിനം 20,000 മുതല്‍ ഒരുലക്ഷം രൂപ വരെയാണ് എടിഎമ്മിനിന്ന് പിന്‍വലിക്കാനാകുക. എസ്ബിഐ സേവിങ്സ് അക്കൗണ്ട് ഉടമകള്‍ക്ക് ഒരു മാസം 8 സൗജന്യ എടിഎം ഇടപാടുകള്‍ വരെ നടത്താം. ഇതിന് ശേഷമുള്ള ഓരോ ഇടപാടിനും ഉപഭോക്താക്കളില്‍ നിന്ന് നിശ്ചിത നിരക്ക് ഈടാക്കും.

അടിസ്ഥാന കാര്‍ഡായ എസ് ബി ഐ ക്ലാസിക് ആന്‍ഡ് മാസ്‌ട്രോ കാര്‍ഡിന്റെ പണം പിന്‍വലിക്കാവുന്ന പരിധി 20,000 രൂപയാക്കിയിട്ടുണ്ട്. ഇത് 10,000 ആയിരുന്നു.

ഒടിപി നിര്‍ബന്ധം

മറ്റ് കാര്‍ഡുകള്‍ക്ക് ബാധകമായ തുക ഇവയാണ്. എസ്ബിഐ ഗ്ലോബല്‍ ഇന്റര്‍നാഷണല്‍ ഡെബിറ്റ് കാര്‍ഡ് - 40,000 രൂപ, എസ്ബിഐ ഗോള്‍ഡ് ഇന്റര്‍നാഷണല്‍ ഡെബിറ്റ് കാര്‍ഡ് - 50,000 രൂപ, എസ്ബിഐ പ്ലാറ്റിനം ഇന്റര്‍നാഷണല്‍ ഡെബിറ്റ് കാര്‍ഡ് - 1,00,000 രൂപ, എസ്ബിഐ മുംബൈ മെട്രോ കോംബോ കാര്‍ഡ് - 40,000 രൂപ, എസ്ബിഐ മൈ കാര്‍ഡ് ഇന്റര്‍നാഷണല്‍ ഡെബിറ്റ് കാര്‍ഡ് - 40,000 രൂപ, എസ്ബിഐഎന്‍ടച്ച് ടാപ്പ് & ഗോ ഡെബിറ്റ് കാര്‍ഡ് - 40,000 രൂപ.

സുരക്ഷ മുന്‍നിര്‍ത്തി 10,000 രൂപയില്‍ കൂടുതലുളള എടിഎം ഇടപാടുകള്‍ക്ക് ഒടിപി നിര്‍ബന്ധമാക്കിയിട്ടുണ്ട്. എടിഎം കൗണ്ടറിലെത്തി രജിസ്റ്റര്‍ ചെയ്ത മൊബൈല്‍ നമ്പറില്‍ ബാങ്ക് അയച്ച ഒടിപി നല്‍കി പണം പിന്‍വലിക്കാം.

English Summary : New Withdrawl Limit of Sbi Debit Cards