സിബിൽ സ്കോർ മികച്ചത്, വായ്പ എടുക്കുന്ന സ്ത്രീകളുടെ എണ്ണം കുതിച്ചുയരുന്നു
Mail This Article
രാജ്യത്ത് ചെറുകിട വായ്പ എടുത്തിട്ടുള്ള സ്ത്രീകളുടെ എണ്ണം 47 ദശലക്ഷത്തിനു മുകളിലെത്തി. രാജ്യത്തെ റീട്ടെയില് വായ്പയുടെ 28 ശതമാനത്തോളം വരുമിതെന്ന് ട്രാന്സ് യൂണിയന് സിബിൽ റിപ്പോര്ട്ടില് പറയുന്നു. വായ്പ എടുക്കുന്ന വനിതകളുടെ എണ്ണം കഴിഞ്ഞ ആറു വര്ഷക്കാലത്ത് 21 ശതമാനം വാര്ഷിക വളര്ച്ച നേടിയിട്ടുണ്ടെന്ന് സിബില് ചീഫ് ഓപ്പറേറ്റിംഗ് ഓഫീസര് ഹര്ഷല ചന്ദ്രോര്ക്കര് ചൂണ്ടിക്കാട്ടി. സെപ്റ്റംബര് 2014 ല് 23 ശതമാനമായിരുന്നത് സെപ്റ്റംബര് 2020ല് 28 ശതമാനമായി ഉയര്ന്നു.
ഇതേ കാലയളവില് പുരുഷന്മാരായ വായ്പക്കാരുടെ പ്രതിവര്ഷ വളര്ച്ച 16 തമാനത്തോളമാണ്.
സ്ത്രീകളുടെ ശരാശരി സിബില് സ്കോര് (719) പുരുഷന്മാരുടേതിനേക്കാള് (709) മെച്ചപ്പെട്ടതാണെന്നതാണ് ഇതിനു ഒരു പ്രധാന കാരണം. മാത്രമല്ല, മികച്ച തിരിച്ചടവു ചരിത്രം സ്ത്രീകൾക്കുണ്ടെന്നതും അനുകൂല ഘടകമാണ്. സ്ത്രീകളില് 61 ശതമാനത്തിലധികം പേരുടെ ക്രെഡിറ്റ് സ്കോര് 720-ന് മുകളിലാണ്. പുരുഷന്മാരുടെ കാര്യത്തിലിത് 56 ശതമാനമാണ്.
വനിതകള്ക്ക് അനുവദിച്ചിട്ടുള്ള വായ്പത്തുക 15.1 ലക്ഷം കോടി രൂപയാണ്. ആറുവര്ഷക്കാലത്ത് വായ്പത്തുകയിലുണ്ടായ പ്രതിവര്ഷ വളര്ച്ച 12 ശതമാനമാണ്. വ്യക്തിഗത വായ്പകളും കണ്സ്യൂമര് ഡ്യൂറബിള് വായ്പകളുമാണ് സ്ത്രീകള് ഏറ്റവും കൂടുതല് എടുക്കുന്നത്. വായ്പകളെക്കുറിച്ചുള്ള വനിതകളുടെ അവബോധവും ഗണ്യമായി വര്ധിച്ചിട്ടുണ്ടെന്നും റിപ്പോർട്ട് പറയുന്നു.
English Summary: Number of Women Loan Takers are Increasing