ഒറ്റ തവണ പണമടച്ചാൽ മതി, മാസം തോറും വരുമാനം!

ഓഹരി വിപണികളും, മ്യൂച്ചൽ ഫണ്ടുകളും തളർച്ച രേഖപ്പെടുത്തുമ്പോൾ ഒറ്റ തവണ പണമടച്ച് പ്രതിമാസ വരുമാനം നേടാവുന്ന എസ് ബി ഐ പദ്ധതി ആകർഷകമാകുന്നു.'എസ്ബിഐ ആന്വിറ്റി ഡെപ്പോസിറ്റ് സ്കീം' എന്നതാണ് ഈ പദ്ധതി. എല്ലാ എസ് ബി ഐ ശാഖകളിലും ഇത്  ലഭ്യമാണ്. ഒരു സ്ഥലത്തുള്ള എസ് ബി ഐയിൽനിന്നും മറ്റൊരിടത്തെ എസ് ബി ഐ യിലേക്ക്  ഈ പദ്ധതി  കൈമാറ്റം ചെയ്യാനും സാധിക്കും. ഈ പദ്ധതിക്ക് കീഴിൽ ഉപഭോക്താവ് ഒരു നിശ്ചിത തുക ഒരുമിച്ചു നിക്ഷേപിച്ചാൽ അത് തുല്യമായ പ്രതിമാസ തവണകളായി ഉപഭോക്താവിന് തിരിച്ചു ലഭിക്കും. 

മറ്റ് സവിശേഷതകൾ 

∙ഏറ്റവും കുറഞ്ഞ പ്രതിമാസ വാർഷിക തുകയായ 1000 രൂപയെ അടിസ്ഥാനമാക്കിയുള്ളതാണ് നിക്ഷേപ തുക. അതായത് 3 വർഷത്തെ സ്കീമിന് ഒരു ഉപഭോക്താവ് കുറഞ്ഞത് 36,000 രൂപ നിക്ഷേപിക്കണം. നിക്ഷേപ തുകയ്ക്ക് ഉയർന്ന പരിധിയില്ല.

∙എസ്ബിഐ ആന്വിറ്റി ഡെപ്പോസിറ്റ് സ്കീമിന് കീഴിൽ 15 ലക്ഷം രൂപ വരെയുള്ള നിക്ഷേപങ്ങൾക്ക് പ്രി മെച്വർ  പേയ്മെന്റ് അനുവദിക്കും.

∙സാധാരണക്കാർക്കും, മുതിർന്ന പൗരന്മാർക്കും സ്ഥിര നിക്ഷേപങ്ങൾക്ക് ബാധകമായ പലിശ നിരക്ക് തന്നെയാണ് ഇവിടെയും

∙പ്രത്യേക കേസുകളിൽ ഓവർഡ്രാഫ്റ്റ് അല്ലെങ്കിൽ വാർഷിക തുകയുടെ 75 ശതമാനം വരെ വായ്പ അനുവദിക്കും.

∙പ്രായപൂർത്തിയാകാത്തവർ ഉൾപ്പെടെ എല്ലാ  ഉപഭോക്താക്കൾക്കും ഈ സൗകര്യം പ്രയോജനപ്പെടുത്താം.

∙എൻആർഒ, എൻആർഇ ഉപഭോക്താക്കൾക്ക് എസ്ബിഐ ആന്വിറ്റി ഡെപ്പോസിറ്റ് സ്കീം സൗകര്യം ലഭിക്കില്ല.

English Summary : Know more about SBI Annuity Deposite Scheme