ധനകാര്യസ്ഥാപനങ്ങളുടെ പിഴത്തുക ആർബിഐ കൂട്ടിയേക്കും

ന്യൂഡൽഹി∙ റിസർവ് ബാങ്ക് നിയന്ത്രിക്കുന്ന ധനകാര്യസ്ഥാപനങ്ങളുടെ ചട്ടലംഘനങ്ങൾക്കുള്ള പിഴത്തുക വർധിപ്പിച്ചേക്കുമെന്ന് റിപ്പോർട്ടുകൾ. ബാങ്കുകൾ അടക്കമുള്ള സ്ഥാപനങ്ങളുടെ ഭരണസംവിധാനം ശക്തിപ്പെടുത്തുന്നതിനാണ് നടപടി. ധനകാര്യസ്ഥാപനങ്ങളുടെ വലുപ്പമനുസരിച്ച് പിഴത്തുക നിർണയിക്കുക, ആവർത്തിച്ചുള്ള പിഴവുകൾക്ക് അധികപിഴ, തലപ്പത്തുള്ള ജീവനക്കാരിൽ നിന്ന് തുക തിരിച്ചുപിടിക്കുക അടക്കമുള്ള കാര്യങ്ങൾ പരിഗണിച്ചേക്കും. 2022–23ൽ 211 കേസുകളിലായി 40.39 കോടി രൂപയാണ് വിവിധ സ്ഥാപനങ്ങളുടെമേൽ ആർബിഐ ചുമത്തിയത്. ആർബിഐ നിലവിൽ ചുമത്തുന്ന പിഴ മറ്റ് രാജ്യങ്ങളുമായി താരതമ്യം ചെയ്യുമ്പോൾ കുറവാണെന്നും വിലയിരുത്തലുണ്ട്.