ആദായ നികുതി ലാഭിക്കണോ? വീടു വാങ്ങൂ

ഭൂമി,താമസത്തിനുപയോഗിക്കാത്ത മറ്റാവശ്യങ്ങൾക്കുള്ള കെട്ടിടം, ഓഹരി, ഡിബഞ്ചർ, ബോണ്ട്, തുടങ്ങിയ ദീർഘകാല മൂലധന ആസ്തികൾ വിറ്റു കിട്ടുന്ന ലാഭം ആദായനികുതിയിൽനിന്നും ഒഴിവാക്കാൻ  ആ തുക ഉപയോഗിച്ച് പുതിയ വീട് വാങ്ങുകയോ പണിയുകയോ ചെയ്താൽ മതി. ഇവിടെ  ചില  നിബന്ധനകൾ കർശനമായി പാലിക്കേണ്ടതുണ്ട്.  ഇവിടെ നിങ്ങൾ അറിയേണ്ട വസ്തുതകൾ ഇവയാണ്.

∙വീടു വിറ്റ തുകയ്ക്ക് ആണ്  വീടു വാങ്ങുന്നതെങ്കിൽ  ലഭിക്കുന്ന ലാഭം മാത്രം വീടിനായി നിക്ഷേപിച്ചാൽ ആദായനികുതിയിൽ നിന്നും ഒഴിവാകാം 

∙വീടല്ലാത്ത വാണിജ്യാവശ്യത്തിനും മറ്റുമുള്ള ആസ്തി ആണെങ്കിൽ  വിറ്റുകിട്ടുന്ന  തുക മുഴുവൻ  പുതിയ വീടിനായി നിക്ഷേപിക്കണം

∙വിറ്റവിലയുടെ ഒരു ഭാഗം മാത്രമാണ് നിക്ഷേപിക്കുന്നതെങ്കിൽ ആനുപാതികമായി മാത്രമേ ഇളവ് ലഭിക്കൂ

∙ആസ്തി വിറ്റ തീയതിക്കു മുൻപുള്ള ഒരു വർഷത്തിനകം, അല്ലെങ്കിൽ  വിറ്റ തീയതിക്കു  രണ്ടു വർഷത്തിനകം  പുതിയവീട് വാങ്ങിയിരിക്കണം

∙വീട്  പണിയിക്കുകയാണെങ്കിൽ മൂന്നു വർഷത്തിനകം പണിതിരിക്കണം.

∙നിലവിൽ ഒരു വീടുള്ള വ്യക്തിക്ക് ഒരു വീടു കൂടി വാങ്ങാം. ഒന്നിലധികം വീടുള്ള വ്യക്തികൾക്ക് ഈ ഇളവിന് അർഹതയില്ല.

∙നികുതിദായകന്റെ പേരിലായിരിക്കണം പുതിയവീട് 

∙ആസ്തി വിറ്റ  സാമ്പത്തിക വർഷത്തെ  ആദായനികുതി റിട്ടേൺ സമർപ്പിക്കേണ്ട തീയതിക്കുമുൻപ് വീടു വാങ്ങുകയോ പണിയുകയോ ചെയ്യണം. അതിനു കഴിയില്ലെങ്കിൽ തുക പൊതുമേഖല, ബാങ്കിന്റെ ക്യാപിറ്റൽ ഗെയിൻസ് അക്കൗണ്ട് സ്കീമിൽ നിക്ഷേപിച്ചിട്ട് ഈ അക്കൗണ്ടിൽനിന്നു പിൻവലിച്ചു മാത്രമേ പുതിയ വീടിനായി  ചെലവഴിക്കാവൂ.

പ്രധാന നിബന്ധന

ഇങ്ങനെ  വാങ്ങിയ അല്ലെങ്കിൽ പണിത വീട്,  മൂന്നു വർഷം പൂർത്തിയായാകാതെ  വിൽക്കുവാൻ പാടില്ല. അതുപോലെ രണ്ടുവർഷത്തിനകം മറ്റൊരു വീടു  വാങ്ങുവാനും പാടില്ല.

(ചാർട്ടേഡ് അക്കൗണ്ടന്റാണ് ലേഖകൻ)