മൂന്നാം ദിവസവും മാറ്റമില്ലാതെ സ്വർണ വില

സംസ്ഥാനത്ത് സ്വർണ വില മൂന്നാം ദിവസവും മാറ്റമില്ലാതെ തുടരുന്നു. ഗ്രാമിന്  4,460 രൂപയും പവന്  35,680 രൂപയും ആണ് തിങ്കളാഴ്ച  രേഖപ്പെടുത്തിയിരിക്കുന്നത്. ശനിയാഴ്ച മുതൽ ഇതെ വിലയിലാണ് വ്യാപാരം നടക്കുന്നത്. സ്വർണം കഴിഞ്ഞ രണ്ടു മാസത്തിനിടയിലെ ഏറ്റവും ഉയർന്ന നിരക്കായ 36,080 രൂപ പവന് വ്യാഴാഴ്ച  രേഖപ്പെടുത്തിയിരുന്നു. പവന് ഏറ്റവും കുറഞ്ഞ വില  ഏപ്രിൽ 1 ന് രേഖപ്പെടുത്തിയ 33,320 രൂപയാണ്. 

അതേ സമയം രാജ്യാന്തര വിപണിയിൽ എംസിഎക്‌സിന്റെ സ്വർണ്ണ ഫ്യൂച്ചർ 0.11 ശതമാനം അഥവാ 52 രൂപ ഉയർന്ന് 10 ഗ്രാമിന് 47,584 രൂപയായി. സിൽവർ ഫ്യൂച്ചറുകൾ 0.01 ശതമാനം അഥവാ 9 രൂപ കുറഞ്ഞ് കിലോയ്ക്ക് 68,665 രൂപയായി. ആഗോള വിപണിയിൽ സ്‌പോട്ട് സ്വർണം 0.1 ശതമാനം ഉയർന്ന് ഔൺസിന് 1,779.36 ഡോളറിലെത്തി. യുഎസ് സ്വർണ്ണ ഫ്യൂച്ചർ 0.1 ശതമാനം ഉയർന്ന് 1,780.10 ഡോളറിലെത്തി. 

കോവിഡ് വ്യാപനത്തിന്റെ പശ്ചാത്തലത്തിൽ  രാജ്യാന്തര വിപണിയിൽ 1800  ഡോളറെന്ന  കടമ്പ കടക്കാൻ  ബുദ്ധിമുട്ടിയ  സ്വർണവില  1770 ഡോളറിലാണ് പിന്തുണ കണ്ടെത്തിയത്.1760 ഡോളറിൽ സ്വർണം അടുത്ത  സപ്പോർട്ട് സ്വന്തമാക്കിയേക്കാം. ഫെഡ് റിസേർവിന്റെ  ഈയാഴ്ച  നടക്കുന്ന  പോളിസി  മീറ്റിംഗ്  സ്വർണത്തിനും  പ്രധാനമാണെന്ന് വിദഗ്ദർ പറഞ്ഞു.

English Summary: Gold Price Unchanged For Three Days