പുതിയ എല്ഐഎസി ജീവന് ശാന്തി പദ്ധതിയിൽ വായ്പാസൗകര്യവും
Mail This Article
എല്ഐസി ആനുകാലികമായി ഉപഭോക്താക്കള്ക്ക് വേണ്ടി പുതിയ പദ്ധതികള് അവതരിപ്പിക്കാറുണ്ട്. ഇത്തവണ പുതിയ ജീവന് ശാന്തി പ്ലാനുമായാണ് എല്ഐസി എത്തിയിരിക്കുന്നത്. ഇതൊരു നോണ്-ലിങ്ക്ഡ്, നോണ് പാര്ട്ടിസിപ്പേറ്റിങ് , വ്യക്തിഗത, സിംഗിള് പ്രീമിയം, ഡിഫേര്ഡ് ആന്വിറ്റി പ്ലാന് ആണ്. ഈ പ്ലാന് ഓണ്ലൈനായും ഓഫ്ലൈനായും വാങ്ങാം. എല്ഐസിയുടെ ഈ പുതിയ പ്ലാനില് ഉപഭോക്താക്കള്ക്ക് വായ്പയ്ക്കുള്ള സൗകര്യവും ലഭിക്കും. പോളിസിയുടെ തുടക്കത്തില് തന്നെ ആന്വിറ്റി നിരക്കുകള് ഉറപ്പ് നല്കുന്നു. ഡിഫര്മെന്റ് കാലയളവിന് ശേഷം ഉപഭോക്താവിന്റെ ജീവിതകാലം മുഴുവന് ആന്വിറ്റികള് ലഭ്യമാക്കും.
പുതിയ ജീവന് ശാന്തി സ്കീമിന്റെ സവിശേഷതകള്
∙ഒറ്റത്തവണ പ്രീമിയം അടയ്ക്കേണ്ട പോളിസിയാണിത്, നിശ്ചിത കാലാവധിക്ക് ശേഷമായിരിക്കും അന്വിറ്റി ലഭ്യമായി തുടങ്ങുക.
∙ഒറ്റയ്ക്കും സംയുക്തമായും പോളിസി എടുക്കാം.
∙സംയുക്ത പോളിസിയില് ഒരു കുടുംബത്തിലെ രണ്ട് പേര്ക്ക് പങ്കാളികളാകാം. ഭര്ത്താവ് , ഭാര്യ, മക്കള്, കൊച്ചു മക്കള്, സഹോദരങ്ങള്, മാതാപിതാക്കള്, അവരുടെ മാതാപിതാക്കള് എന്നിങ്ങനെ അടുത്ത ബന്ധുക്കളില് ആരുമാകാം പങ്കാളി.
∙ഡിഫര്മെന്റ് കാലയളവിന് ശേഷം ജീവിതകാലം മുഴുവന് അന്വിറ്റി ലഭ്യമാക്കും. അന്വിറ്റി ലഭിക്കുന്നയാള് മരിച്ചാല് മരണാനുകൂല്യം നോമിനിക്ക് നല്കും.
∙ഈ പ്ലാന് വാങ്ങുന്നതിനുള്ള കുറഞ്ഞ നിക്ഷേപം ഒന്നര ലക്ഷം രൂപ ആണ്.
∙ഉയര്ന്ന നിക്ഷേപ പരിധി ഇല്ല.
∙പ്രതിമാസം, 3 മാസത്തില് ഒരിക്കല്, ആറ് മാസത്തില് ഒരിക്കല്, വര്ഷത്തില് ഒരിക്കല് എന്നിങ്ങനെ ആന്വിറ്റി സ്വീകരിക്കാം.
∙ഈ പ്ലാനിലെ കുറഞ്ഞ മാസ വരുമാനം 12,000 രൂപയാണ്.
∙30 വയസ്സു മുതല് 79 വയസ്സ് വരെയുള്ളവര്ക്ക് ഈ പദ്ധതിയില് ചേരാം.
∙പോളിസിയുടെ കുറഞ്ഞ ഡിഫര്മെന്റ് കാലാവധി ഒരു വര്ഷവും പരമാവധി ഡിഫര്മെന്റ് കാലാവധി 12 വര്ഷവുമാണ്.
∙അഞ്ച് ലക്ഷം രൂപയോ അതില് കൂടുതലോ ആണ് പര്ച്ചേഴ്സ് നിരക്ക് എങ്കില് ഇന്സെന്റീവ് ലഭ്യമാകും.
∙അംഗവൈകല്യം ഉള്ളവര്ക്ക് 50,000 രൂപയ്ക്ക് പ്ലാന് വാങ്ങാന് കഴിയും.
English Summary : Details of LIC's New Jeevan Shanti