70 വയസായോ? വൈകിയിട്ടില്ല, ഇനിയും പെൻഷൻ ഉറപ്പാക്കാം
Mail This Article
എഴുപതിന്റെ ചെറുപ്പത്തിലും നിങ്ങൾക്ക് മോഹമുണ്ടെങ്കിൽ എൻ പി എസ് (ദേശീയ പെൻഷൻ പദ്ധതി )ൽ അംഗമായി പ്രതിമാസ പെൻഷൻ നേടാം. എൻ പി എ സിൽ ചേരാനുള്ള പ്രായപരിധി ഇപ്പോൾ 65ൽ നിന്ന് 70 ആക്കി ഉയർത്തിയിട്ടുണ്ട് .
അക്കൗണ്ട് അവസാനിപ്പിച്ചവർക്കും ചേരാം
65നും 70നും ഇടയിൽ എൻ പി എസിൽ ചേരുന്നവർക്ക് 75 വയസ്സുവരെ പദ്ധതിയിൽ തുടരാം. പ്രായപരിധി വർധിപ്പിച്ചതിനാൽ നിലവിൽ എൻ പി എസ് അക്കൗണ്ട് ക്ലോസ് ചെയ്തവർക്ക് പുതിയ അക്കൗണ്ട് തുറക്കാനും പി എഫ് ആർ ഡി എ അനുമതി നൽകിയിട്ടുണ്ട്. 65 വയസു കഴിഞ്ഞ് ചേരുന്ന നിക്ഷേപകർക്ക് അവരുടെ നിക്ഷേപത്തിന്റെ 50 ശതമാനം വരെ ഓഹരി വിപണിയിൽ നിക്ഷേപിക്കാനും അവസരമുണ്ട്.
എത്ര പിൻവലിക്കാം?
65 വയസിനു ശേഷം പദ്ധതിയിൽ ചേരുന്നവർക്ക് ആവശ്യമെങ്കിൽ 3 വർഷം കഴിഞ്ഞ് അവസാനിപ്പിക്കാം. നിക്ഷേപം 5 ലക്ഷത്തിൽ കൂടുതലാണെങ്കിൽ 60 ശതമാനം തുക പിൻവലിക്കാം. ബാക്കി 40 ശതമാനം തുക പെൻഷൻ ലഭിക്കാനുള്ള ആന്വിറ്റികൾ വാങ്ങിയിരിക്കണം 5 ലക്ഷത്തിൽ താഴെയാണെങ്കിൽ മൊത്തം തുകയും പിൻവലിക്കാം.
ആദായ നികുതി ഇളവും കിട്ടും
കേന്ദ്ര സർക്കാർ പെൻഷൻ പദ്ധതിയായ എൻ പി എ സിൽ 18 വയസ്സു മുതൽ 70 വയസ്സുവരെയുള്ള ആർക്കും അംഗങ്ങളാകാം. ഈ പദ്ധതിയിൽ നിക്ഷേപിക്കുന്നതിലൂടെ ഓഹരി വിപണിയിൽ നിന്നുള്ള നേട്ടങ്ങൾ സ്വന്തമാക്കാമെന്നു മാത്രമല്ല ആദായ നികുതി ഇളവും കരസ്ഥമാക്കാം.
English Summary: NPS Age Limit Extended Upto 70 Years