ഉപയോഗിക്കുന്നില്ലാത്ത ബാങ്ക് അക്കൗണ്ട് നിങ്ങൾക്കുണ്ടോ?
Mail This Article
നിങ്ങൾ ഇപ്പോൾ ഉപയോഗിക്കാത്തതോ അല്ലെങ്കിൽ വിട്ടുപോയതോ മറന്നതോ ആയ ഏതെങ്കിലും ബാങ്ക് നിക്ഷേപമുണ്ടോ? അല്ലെങ്കിൽ മുടങ്ങിപ്പോയ ലൈഫ് ഇൻഷുറൻസ് പോളിസിയുണ്ടോ? എങ്കിൽ ഇപ്പോഴത്തെ പ്രതിസന്ധിഘട്ടത്തിൽ അടിയന്തരാവശ്യത്തിനു പണം കണ്ടെത്താൻ അത് ഉപയോഗപ്പെടുത്താം,
അവകാശികളില്ലാതെ പതിനായിരക്കണക്കിനു കോടി രൂപയാണ് ബാങ്ക്, പോസ്റ്റ് ഓഫിസ്, പിഎഫ് നിക്ഷേപങ്ങളിൽ കിടക്കുന്നത്. ഓഹരി, മ്യൂച്വൽ ഫണ്ട് കണക്കുകളെടുത്താൽ തുക പലമടങ്ങാകും. മാതാപിതാക്കളുടെ പേരിലോ സ്വന്തംപേരിലോ ഉള്ള നിക്ഷേപം പലവിധ കാരണങ്ങളാൽ ക്ലെയിം ചെയ്യാതെ കിടക്കുന്നുണ്ടോയെന്നു കണ്ടെത്തുക. ഉണ്ടെങ്കിൽ അവ തിരിച്ചു പിടിക്കാനുള്ള അവസരമാണിത്. രേഖകൾക്കും നടപടിക്രമങ്ങൾ പൂർത്തിയാക്കാനും അൽപം ബുദ്ധിമുട്ടേണ്ടി വരാം. പക്ഷേ, അതിനു തയാറായാൽ മോശമല്ലാത്ത തുക പലർക്കും ഉറപ്പാക്കാനാകും.
മുടങ്ങിക്കിടക്കുന്ന ലൈഫ് പോളിസികൾ
വാങ്ങിയ ശേഷം കാര്യമായ നേട്ടമില്ലെന്നതു കൊണ്ടോ അടയ്ക്കാൻ പണമില്ലാത്തതുകൊണ്ടോ മുടങ്ങിയ ലൈഫ് പോളിസികൾ ഒട്ടേറെ പേർക്ക് ഉണ്ടെന്നതാണ് യാഥാർഥ്യം. ലക്ഷങ്ങൾ വരെ ഇത്തരം പോളിസികളിൽ കെട്ടിക്കിടക്കുന്നുണ്ട്. പത്തോ പതിനഞ്ചോ വർഷം കഴിഞ്ഞാൽ അടച്ച തുകയോ അൽപം അധികമോ ആകും തിരിച്ചുകിട്ടുക. അത്തരം പോളിസി പിൻവലിച്ച് പ്രയോജനപ്പെടുത്താനുള്ള നല്ല അവസരം ആണിത്. മൂന്നു വർഷമെങ്കിലും പ്രീമിയം അടച്ചിട്ടില്ലാത്തവർക്ക് വലിയ നഷ്ടം ഉണ്ടാകും.
പക്ഷേ, പോളിസി പുനരുജ്ജീവിപ്പിക്കാൻ അടയ്ക്കേണ്ട തുകയും തിരിച്ചുകിട്ടുന്ന തുകയും പരിഗണിക്കുമ്പോൾ പിൻവലിക്കുന്നതു തന്നെയാണ് ലാഭം. മാത്രമല്ല ഈ അവസരത്തിൽ അതു കിട്ടിയാൽ വലിയ ആശ്വാസമാണല്ലോ.
English Summery:Find Emergency Money through Dormant Account