ഇലക്ട്രിക് വാഹനങ്ങൾക്ക് ഇനി വൈദ്യുതി വെറുതെ കിട്ടില്ല
Mail This Article
ഇലക്ട്രിക്ക് വാഹനങ്ങൾക്ക് കെ എസ് ഇ ബി നൽകിയിരുന്ന സൗജന്യ വൈദ്യുതി ഇനി ഉണ്ടാകില്ല.യൂണിറ്റിന് 15 രൂപ നിരക്ക് നൽകേണ്ടി വരും. ഇതിനുള്ള അനുമതി റഗുലേറ്ററി കമ്മീഷൻ നല്കി. വൈദ്യുത വാഹനങ്ങളുടെ പ്രോല്സാഹനം ലക്ഷ്യമിട്ട് ഇതുവരെ റീചാർജിങ് സൗജന്യമായിരുന്നു. ഒരു കാർ ഒറ്റത്തവണ പൂർണമായും ചാർജ് ചെയ്യുന്നതിന് 30 യൂണിറ്റ് വൈദ്യുതി വേണ്ടിവരും.
സംസ്ഥാന സർക്കാറിന്റെ ഇ വെഹിക്കിൾ നയമനുസരിച്ച് വൈദ്യുതി ചാർജിങ് സ്റ്റേഷനുകൾ സ്ഥാപിക്കാനുള്ള നോഡൽ ഏജൻസിയായി കെ എസ് ഇ ബിയെ തിരഞ്ഞെടുത്തിട്ടുണ്ട്. കേരളത്തിലെ ആറു കോർപ്പറേഷൻ പരിധിക്കുള്ളിൽ കെ എസ് ഇ ബി ചാർജിങ് സ്റ്റേഷനുകൾ സ്ഥാപിച്ചിട്ടുണ്ട്. ആറുമാസത്തിനകം 600 ചാർജിങ് സ്റ്റേഷനുകൾ സ്ഥാപിക്കാനാണ് കെ എസ് ഇ ബി യുടെ തീരുമാനം .
നിലവിലെ ഇന്ധന വില കണക്കിലെടുക്കുമ്പോൾ പുതിയ ചാർജിങ് നിരക്ക് ലാഭകരമെന്നാണ് വാഹന ഉടമകളുടെ അഭിപ്രായം .കഴിഞ്ഞ ഒരു വർഷത്തിനിടയിൽ സംസ്ഥാനത്ത് ഇലക്ട്രിക് വാഹനങ്ങളുടെ വില്പനയിൽ കുതിച്ചു ചാട്ടമുണ്ടായി. ഈ സാഹചര്യം കണക്കിലെടുത്താണ് കെ എസ് ഇ ബി കൂടുതൽ ചാർജിങ് സ്റ്റേഷനുകൾ സ്ഥാപിക്കുന്നത്.
English Summary: KSEB will Charge Fee for Electricity Refueling in E Vehicles soon