സിഡ്നിയിൽ ഇന്ന് ആരംഭിക്കുന്ന ഇന്ത്യ-ഓസ്ട്രേലിയ അവസാന ക്രിക്കറ്റ് ടെസ്റ്റ് ഫലം എന്താവും? കേരള രഞ്ജി ടീം ക്യാപ്റ്റൻ സച്ചിൻ ബേബിയും മുൻകാല ക്യാപ്റ്റൻമാരും പ്രവചിക്കുന്നു.
ഫിറോസ് വി.റഷീദ് ∙ ഇന്ത്യക്കാണു സാധ്യത. ആദ്യ ഇന്നിങ്സിൽ 400 റൺസെങ്കിലും സ്കോർ ചെയ്താൽ ജയിക്കാം. സിഡ്നി സ്പിന്നർമാരെയും സഹായിക്കുമെങ്കിലും രണ്ടു സ്പിന്നർമാർ കളിക്കാൻ സാധ്യതയില്ല. ജഡേജയ്ക്കാണു കൂടുതൽ സാധ്യത. ബോളർമാരിലൊരാളാവും മാൻ ഓഫ് ദ് മാച്ച്.
സുനിൽ ഒയാസിസ് ∙ ജയം മാത്രം ലക്ഷ്യമിട്ടാവും ഓസ്ട്രേലിയ കളിക്കുകയെങ്കിലും ഈ ഫോമിൽ സാധ്യത ഇന്ത്യക്കാണ്. ബോളിങ് വിഭാഗം 20 വിക്കറ്റും കൊയ്യാൻ മിടുക്കുള്ളവരാണ്. പ്രത്യേകിച്ചും ബുമ്ര. ഓസ്ട്രേലിയൻ നിരയിൽ കാര്യമായ അനുഭവ സമ്പത്തില്ലാത്തവരാണ് ഏറെ. കോഹ്‌ലിയിൽ നിന്ന് വീണ്ടുമൊരു സെഞ്ചുറി പ്രതീക്ഷിക്കുന്നുണ്ട്.
സോണി ചെറുവത്തൂർ ∙ ഇന്ത്യ ജയിക്കും. ആരെ കളിപ്പിക്കണം എന്ന കാര്യത്തിൽ പോലും ഓസ്ട്രേലിയ ആശയക്കുഴപ്പത്തിലാണ്. ഓസീസ് നിരയിൽ ഉസ്മാൻ ഖവാജയും മിച്ചൽ സ്റ്റാർക്കുമാണ് എന്തെങ്കിലും കാര്യമായി ചെയ്യാൻ മിടുക്കുള്ളവർ. സ്പിൻ പിച്ചെന്നു പറയുമ്പോഴും 2 സ്പിന്നറെ കളിപ്പിക്കാൻ സാധ്യതയില്ല.പൂജാര അല്ലെങ്കിൽ ബുമ്ര ആവും കേമൻ.
സഞ്ജു സാംസൺ ∙ സിഡ്നിയിലും വിജയിച്ച് നമ്മൾ ചരിത്രമെഴുതും. ബോളർമാരും ബാറ്റ്സ്മാൻമാരും സാഹചര്യവുമായി നല്ലവണ്ണം പൊരുത്തപ്പെട്ടിട്ടുണ്ട്. മാനസിക മുൻതൂക്കവും നമ്മൾക്കാണ്. മെൽബണിൽ തിളങ്ങാനാവാതെ പോയ വിരാട് കോഹ്‌ലി അതിനു പകരം വീട്ടി സെഞ്ചുറിയുമായി കളിയിലെ കേമനാവും.
രോഹൻ പ്രേം ∙ ഇന്ത്യ ജയിക്കുമെന്നാണു പ്രതീക്ഷ. ഓപ്പണിങ് ഒഴിച്ചാൽ ബാക്കിയെല്ലാ ഘടകങ്ങളിലും നമ്മൾ കരുത്തരാണ്. മെൽബണിൽ പാളിയതിനു സിഡ്നിയിൽ കോഹ്‌ലി കണക്കു തീർക്കും. മാൻ ഓഫ് ദ് മാച്ച് പട്ടവും സ്വന്തമാക്കും.
സച്ചിൻ ബേബി ∙ഇന്ത്യ ജയിക്കും. ഓസ്ട്രേലിയ വലിയ സമ്മർദത്തിലാണ്. നമ്മൾ നല്ല ആത്മവിശ്വാസത്തിലും. ബോളർമാരുടെ കാര്യത്തിൽ അവരെക്കാൾ കരുത്തരാണ് നമ്മൾ. കോഹ്‌ലിയും പൂജാരയും ജഡേജയും തിളങ്ങുമെന്നാണ് എന്റെ വിശ്വാസം. മാൻ ഓഫ് ദ് മാച്ച് സാധ്യത കോഹ്‍‌ലിക്കു തന്നെ.
