സെഞ്ചുറി കടന്ന് വീണ്ടും വാർണറും ലബുഷെയ്നും; ഓസീസിന് ആധിപത്യം

മെൽബൺ ∙ ഡേവിഡ് വാർണറും (166*) മാർനസ് ലബുഷെയ്നും (126*) തുടർച്ചയായ 2–ാം ടെസ്റ്റിലും സെഞ്ചുറികളുമായി തിളങ്ങിയതോടെ പാക്കിസ്ഥാനെതിരെ ആദ്യദിനം ഓസ്ട്രേലിയയ്ക്ക് സമ്പൂർണ ആധിപത്യം. പകൽ രാത്രി മത്സരത്തിന്റെ ആദ്യ ദിനം ഓസീസ് ഒരു വിക്കറ്റ് നഷ്ടത്തിൽ 302 റൺസെടുത്തു.

ഇരുവരും ചേർന്ന് 2–ാം വിക്കറ്റിൽ ഇതുവരെ 294 റൺസെടുത്തിട്ടുണ്ട്. ബ്രിസ്ബെയ്നിൽ ഓസീസ് ഇന്നിങ്സ് ജയം നേടിയ ആദ്യ ടെസ്റ്റിലും വാർണറും (154), ലബുഷെയ്നും (185) സെഞ്ചുറി നേടിയിരുന്നു. ടോസ് നേടി ബാറ്റിങ്ങിനിറങ്ങിയ ഓസീസിന് 4–ാം ഓവറിൽ ജോ ബേൺസിന്റെ വിക്കറ്റ് നഷ്ടമായി.