‘മങ്കാദിങ്ങിനു’ മുൻപ് മുന്നറിയിപ്പ് നൽകിയെന്ന് ദീപ്തി; കള്ളം പറയരുതെന്ന് ഇംഗ്ലിഷ് ക്യാപ്റ്റൻ

ലണ്ടൻ ∙ മത്സരങ്ങൾ തീർന്നിട്ടും ഇന്ത്യ–ഇംഗ്ലണ്ട് വനിതാ ക്രിക്കറ്റ് പരമ്പരയിലെ ‘പോര്’ അവസാനിക്കുന്നില്ല!  മൂന്നാം ഏകദിനത്തിൽ ഇംഗ്ലണ്ട് നോൺ സ്ട്രൈക്കർ ചാർലി ഡീനിനെ റണ്ണൗട്ടാക്കും (മങ്കാദിങ്) മുൻപ് താക്കീത് നൽകിയിരുന്നെന്ന് ഇന്ത്യൻ പേസർ ദീപ്തി ശർമ പറഞ്ഞു.

എന്നാൽ ചെയ്ത കാര്യത്തെ ന്യായീകരിക്കാൻ വേണ്ടി കള്ളം പറയരുതെന്ന് ഇംഗ്ലണ്ട് ക്യാപ്റ്റൻ ഹീതർ നൈറ്റ് പ്രതികരിച്ചു. താൻ ബോൾ ചെയ്യുന്നതിനു മുൻപ് ക്രീസ് വിട്ടിറങ്ങിയ ഡീനിനെ ദീപ്തി റണ്ണൗട്ടാക്കിയ മത്സരത്തിൽ ഇന്ത്യ 16 റൺസിനു ജയിച്ചിരുന്നു. ഇതേത്തുടർന്ന് ഇന്ത്യൻ ടീമിനെതിരെ വിമർശനവുമായി മുൻ ഇംഗ്ലണ്ട് താരങ്ങൾ രംഗത്തെത്തി.

ഇതിനു മറുപടിയായി രവിചന്ദ്രൻ അശ്വിൻ ഉൾപ്പെടെയുള്ള ഇന്ത്യൻ താരങ്ങളും പ്രതികരിച്ചതോടെ സമൂഹമാധ്യമങ്ങളിലും ചേരിപ്പോരായി. ഇതിനു പിന്നാലെയാണ് വിവാദം ചൂടുപിടിപ്പിച്ച് ദീപ്തിയുടെ വെളിപ്പെടുത്തലും. 

English Summary: We warned Dean first: Deepti Sharma