കേപ്ടൗണിൽ ചരിത്രമെഴുതി ടീം ഇന്ത്യ, ദക്ഷിണാഫ്രിക്കയ്ക്കെതിരെ ഏഴു വിക്കറ്റ് വിജയം

കേപ്ടൗൺ∙ ദക്ഷിണാഫ്രിക്കയ്ക്കെതിരായ രണ്ടാം ടെസ്റ്റിൽ ഇന്ത്യയ്ക്ക് ഏഴു വിക്കറ്റ് വിജയം. ദക്ഷിണാഫ്രിക്ക ഉയർത്തിയ 79 റണ്‍സ് വിജയ ലക്ഷ്യത്തിലേക്ക് 13 ഓവറില്‍ മൂന്നു വിക്കറ്റ് നഷ്ടത്തിൽ ഇന്ത്യയെത്തി. ജയത്തോടെ പരമ്പര 1–1ന് സമനിലയിലായി. കേപ്ടൗണിൽ ദക്ഷിണാഫ്രിക്കയ്ക്കെതിരെ ഇന്ത്യയുടെ ആദ്യ ടെസ്റ്റ് വിജയമാണിത്. ധോണിക്കു ശേഷം ദക്ഷിണാഫ്രിക്കയില്‍ ഒരു ടെസ്റ്റ് പരമ്പര സമനിലയിലാക്കുന്ന രണ്ടാമത്തെ ഇന്ത്യൻ ക്യാപ്റ്റനെന്ന നേട്ടത്തിലേക്ക് രോഹിത് ശർമയുമെത്തി. കേപ്ടൗണിൽ ടെസ്റ്റ് മത്സരം ജയിക്കുന്ന ഏഷ്യയിൽനിന്നുള്ള ആദ്യത്തെ ക്യാപ്റ്റൻ കൂടിയാണു രോഹിത്.

യശസ്വി ജയ്സ്വാൾ (23 പന്തിൽ 28), ശുഭ്മൻ ഗിൽ (11 പന്തിൽ 10), വിരാട് കോലി (11 പന്തിൽ 12) എന്നിവരാണ് ഇന്ത്യൻ നിരയിൽ രണ്ടാം ഇന്നിങ്സിൽ പുറത്തായ ബാറ്റർമാർ. ക്യാപ്റ്റൻ രോഹിത് ശർമ (22 പന്തിൽ 17), ശ്രേയസ് അയ്യർ (ആറു പന്തില്‍ നാല്) എന്നിവർ പുറത്താകാതെനിന്നു. രണ്ടാം ഇന്നിങ്സിൽ ബാറ്റിങ്ങിന് ഇറങ്ങിയ ദക്ഷിണാഫ്രിക്ക 36.5 ഓവറിൽ 176 റൺസെടുത്തു പുറത്തായിരുന്നു. രണ്ടാം ദിവസം മൂന്നു വിക്കറ്റ് നഷ്ടത്തിൽ 62 റൺസെന്ന നിലയിലായിരുന്നു ദക്ഷിണാഫ്രിക്ക ബാറ്റിങ് തുടങ്ങിയത്. ആദ്യ ഇന്നിങ്സിൽ‌ മുഹമ്മദ് സിറാജിനു മുന്നിൽ കുടുങ്ങിയ ആതിഥേയരെ രണ്ടാം ഇന്നിങ്സില്‍ തകർത്തെറിഞ്ഞത് ജസ്പ്രീത് ബുമ്ര. 13.5 ഓവറുകൾ പന്തെറിഞ്ഞ ബുമ്ര 61 റൺസ് വിട്ടുകൊടുത്ത് ആറു വിക്കറ്റു വീഴ്ത്തി. ദക്ഷിണാഫ്രിക്കൻ മണ്ണിൽ ഇതു മൂന്നാം തവണയാണ് ബുമ്ര അഞ്ച് വിക്കറ്റ് നേട്ടത്തിലെത്തുന്നത്.

ദക്ഷിണാഫ്രിക്കയ്ക്കായി ഓപ്പണര്‍ എയ്ഡൻ മാർക്റാം സെഞ്ചറി തികച്ചു. 103 പന്തുകൾ നേരിട്ട താരം 106 റൺസെടുത്താണു പുറത്തായത്. ഒരു ഭാഗത്ത് എയ്ഡൻ മാര്‍ക്‌റാം നിലയുറപ്പിച്ചപ്പോഴും കാര്യമായ പിന്തുണ നൽകാൻ ആരുമുണ്ടായില്ല. ക്യാപ്റ്റൻ ഡീൻ എൽഗാർ (28 പന്തിൽ 12), ടോണി ഡെ സോർസി (7 പന്തിൽ 1),  ട്രിസ്റ്റൻ സ്റ്റബ്സ് (14 പന്തിൽ 1) എന്നിവര്‍ ബുധനാഴ്ച തന്നെ പുറത്തായിരുന്നു. വ്യാഴാഴ്ച കളി തുടങ്ങിയതിനു തൊട്ടുപിന്നാലെ ബുമ്ര വിക്കറ്റു വേട്ട തുടങ്ങിയതോടെ ദക്ഷിണാഫ്രിക്ക നിന്നുവിറച്ചു. 18–ാം ഓവറിലെ അവസാന പന്തില്‍ ഡേവിഡ് ബേഡിങ്ങാമിനെ ബുമ്ര വിക്കറ്റ് കീപ്പർ കെ.എൽ. രാഹുലിന്റെ കൈകളിലെത്തിച്ചു.

കെയ്ൻ വെരെയ്ൻ (ഏഴു പന്തിൽ ഒൻപത്), മാർകോ ജാൻസൻ (ഒന്‍പതു പന്തിൽ 11), കേശവ് മഹാരാജ് (നാല് പന്തിൽ മൂന്ന്) എന്നിവരും ബുമ്രയ്ക്കു മുന്നിൽ കീഴടങ്ങി. 99 പന്തുകളിൽനിന്നാണ് മാർക്റാം സെഞ്ചറി തികച്ചത്. തൊട്ടുപിന്നാലെ മുഹമ്മദ് സിറാജിന്റെ പന്തിൽ ക്യാപ്റ്റൻ രോഹിത് ശർമ ക്യാച്ചെടുത്ത് താരം പുറത്തായി. 12 പന്തിൽ രണ്ട് റൺസ് മാത്രമെടുത്ത റബാദയെ പ്രസിദ്ധ് കൃഷ്ണ മടക്കി. എൻഗിഡിയെ പുറത്താക്കി ബുമ്ര വിക്കറ്റു നേട്ടം ആറാക്കി. 

ഇന്ത്യയ്ക്കും തിരിച്ചടി, 98 റൺസ് ലീഡ്

രണ്ടാം ടെസ്റ്റിന്റെ ആദ്യ ഇന്നിങ്സിൽ ഇന്ത്യ 153 റൺസിനു പുറത്തായി. ഒന്നാം ഇന്നിങ്സിൽ 98 റൺസ് ലീഡാണ് ഇന്ത്യ നേടിയത്. 46 റൺസെടുത്ത വിരാട് കോലിയാണ് ഇന്ത്യയുടെ ടോപ് സ്കോറർ. ഒന്നാം ഇന്നിങ്സിൽ  ഇന്ത്യയ്ക്ക് തുടക്കത്തിൽ തന്നെ ഓപ്പണർ യശ്വസി ജയ്സ്വാളിനെ (പൂജ്യം) നഷ്ടമായി. രണ്ടാം വിക്കറ്റിൽ ക്യാപ്റ്റൻ രോഹിത് ശർമയും (50 പന്തിൽ 39), ശുഭ്മാൻ ഗിൽ (55 പന്തിൽ 36) ചേർന്നുള്ള ബാറ്റിങ് ഇന്ത്യയെ കൂറ്റൻ ലീഡിലേക്ക് നയിക്കുമെന്ന് പ്രതീക്ഷിച്ചു. എന്നാൽ 15–ാം ഓവറിൽ രോഹിത്തിനെ പുറത്താക്കി ബർഗർ ആ പ്രതീക്ഷ തകർത്തു. പിന്നീട് മികച്ച കൂട്ടുകെട്ടുകൾ ഉണ്ടാകാതെ പോയതാണ് ഇന്ത്യൻ ഇന്നിങ്സിനു തിരിച്ചടിയായത്.

ഇന്ത്യൻ ഇന്നിങ്സിൽ ആറു പേർ പൂജ്യത്തിനു പുറത്തായി. 153 എന്ന സ്കോറിൽ നിൽക്കെയാണ് അവസാന ആറു വിക്കറ്റുകളും ഇന്ത്യയ്ക്കു നഷ്ടമായത്. ജയ്‌സ്വാളിനെ കൂടാതെ ശ്രേയസ്സ് അയ്യർ, രവീന്ദ്ര ജഡേജ, ജസ്പ്രീത് ബുമ്ര, മുഹമ്മദ് സിറാജ്, പ്രസിദ്ധ് കൃഷ്ണ എന്നിവരാണ് മറ്റു സംപൂജ്യക്കാർ. കെ.എൽ.രാഹുൽ എട്ടു റൺസെടുത്തു. മുകേഷ് കുമാർ (പൂജ്യം*) പുറത്താകാതെ നിന്നു.

ആദ്യ ഇന്നിങ്സിൽ ദക്ഷിണാഫ്രിക്ക 55 ന് പുറത്ത്

ടോസ് നേടി ബാറ്റിങ്ങിന് ഇറങ്ങിയ ദക്ഷിണാഫ്രിക്ക വെറും 23.2 ഓവറിൽ 55 റൺസെടുത്തു പുറത്തായി. ആറു വിക്കറ്റു വീഴ്ത്തി കേപ്ടൗണിൽ തീക്കാറ്റായ മുഹമ്മദ് സിറാജാണ് ദക്ഷിണാഫ്രിക്കയെ തകർത്തെറിഞ്ഞത്. 15 റൺസെടുത്ത കെയ്ൽ വെറെയ്നെയാണ് ദക്ഷിണാഫ്രിക്കയുടെ ടോപ് സ്കോറർ. വെറെയ്നു പുറമേ ഡേവിഡ് ബെഡിങ്ഹാം മാത്രമാണു രണ്ടക്കം കടന്ന മറ്റൊരു ദക്ഷിണാഫ്രിക്കൻ താരം.

ജസ്പ്രീത് ബുമ്ര, മുകേഷ് കുമാർ എന്നിവർ രണ്ടു വിക്കറ്റു വീതം വീഴ്ത്തി. സ്കോർ എട്ടു റൺസിൽ നിൽക്കെയാണ് ദക്ഷിണാഫ്രിക്കയുടെ ആദ്യ വിക്കറ്റു വീണത്. ഓപ്പണർമാരായ എയ്ഡൻ മാർക്റാം (രണ്ട്), ഡീൻ എൽഗാർ എന്നിവർ മടങ്ങി. ടെസ്റ്റിലെ അരങ്ങേറ്റ മത്സരത്തിനിറങ്ങിയ ട്രിസ്റ്റൻ സ്റ്റബ്സിനെ ജസ്പ്രീത് ബുമ്ര വീഴ്ത്തി. 11 പന്തുകളിൽനിന്ന് മൂന്ന് റൺസാണ് സ്റ്റബ്സ് നേടിയത്. ടോണി ഡെ സോർസി (രണ്ട്), ഡേവിഡ് ബേഡിങ്ങാം (17 പന്തിൽ 12), കെയ്ൽ വെറെയ്ൻ (30 പന്തിൽ 15), മാർകോ ജാൻസൻ (പൂജ്യം) എന്നിവരെക്കൂടി പുറത്താക്കി സിറാജ് ദക്ഷിണാഫ്രിക്കയുടെ നടുവൊടിച്ചു. കേശവ് മഹാരാജിന്റേയും (മൂന്ന്), കഗിസോ റബാദയുടേയും വിക്കറ്റുകൾ (അഞ്ച്) മുകേഷ് കുമാറിനാണ്.