ക്രിസ്റ്റ്യാനോ നിറംമങ്ങി, മനം കവർന്ന് ഫെലിക്സ്; പോർച്ചുഗലിന് ‘സന്തോഷം’

സ്റ്റോക്ഹോം ∙ ക്രിസ്റ്റ്യാനോ റൊണാൾഡോയുടെ മാസ്മരികത കാണാൻ കാത്തിരുന്നവരെ അമ്പരിപ്പിച്ച് മറ്റൊരു പോർച്ചുഗീസ് താരം. ഇന്റർനാഷനൽ ചാംപ്യൻസ് കപ്പ് സൗഹ‍‍ൃദ ഫുട്ബോളിൽ, ഇറ്റാലിയൻ ക്ലബ് യുവെന്റസും സ്പാനിഷ് ക്ലബ്ബ് അത്‌ലറ്റിക്കോ മഡ്രിഡുമായുള്ള മത്സരത്തിലാണ് കൗമാരതാരം ജോവ ഫെലിക്സ് ഒരു ഗോൾ നേടിയും ഒന്നിനു വഴിയൊരുക്കിയും ആരാധകശ്രദ്ധ നേടിയത്.

ഫ്രഞ്ച് താരം കിലിയൻ എംബപെയ്ക്കു ശേഷമുള്ള ഏറ്റവും വലിയ കൈമാറ്റത്തുക (1012 കോടി രൂപ) എന്ന റെക്കോർഡുമായി പോർച്ചുഗലിലെ ബെൻഫിക്കയിൽനിന്ന് അത്‌ലറ്റിക്കോയിലെത്തിയ ജോവയുടെ മികവിൽ ക്ലബ് യുവെന്റസിനെ 2–1നു തോൽപിക്കുകയും ചെയ്തു. 24–ാം മിനിറ്റിൽ ജോവ ഒരുക്കി നൽകിയ അവസരം മുതലെടുത്ത് തോമസ് ലെമാർ അത്‌ലറ്റിക്കോയുടെ ആദ്യഗോൾ നേടി. പിന്നാലെ യുവെ മിഡ്ഫീൽഡർ സാമി ഖെദീര ഗോൾ മടക്കി. എന്നാൽ, 33–ാം മിനിറ്റിൽ ജോവ നേടിയ ഗോളിൽ അത്‌ലറ്റിക്കോ വിജയമുറപ്പിച്ചു.

ജോവയുടെ പ്രകടനത്തെ അത്‌ലറ്റിക്കോ കോച്ച് ഡിയേഗോ സിമിയോണി വാനോളം പുകഴ്ത്തുകയും ചെയ്തു. അത്‌ലറ്റിക്കോ മഡ്രിഡിന്റെ 5 പ്രീ സീസൺ മത്സരങ്ങളിൽ ഇറങ്ങിയ ജോവ ഫെലിക്സ് 3 ഗോൾ നേടി. 4 ഗോളുകൾക്ക് വഴിയൊരുക്കി. യുവെന്റസ് താരം ക്രിസ്റ്റ്യാനോ റൊണാൾഡോ കളിയിൽ നിറംമങ്ങി. 71–ാം മിനിറ്റിൽ പകരമിറങ്ങിയ മാരിയോ മാൻസൂകിച്ചിനും കാര്യമായൊന്നും ചെയ്യാനായില്ല.