ബൽജിയത്തിനു യൂറോ യോഗ്യത

പാരിസ് ∙ ഫിഫ ലോക ഫുട്ബോൾ റാങ്കിങ്ങിൽ ഒന്നാം സ്ഥാനക്കാരായ ബൽജിയം 211–ാം റാങ്കുകാരായ സാൻമാരിനോയെ 9–0നു തകർത്ത് അടുത്ത വർഷത്തെ യൂറോകപ്പ് ഫുട്ബോളിനു  യോഗ്യത നേടുന്ന ആദ്യ ടീമായി. 2 ഗോൾ നേടിയ റൊമേലു ലുക്കാകു രാജ്യത്തിനായി 50 ഗോൾ തികച്ചു. 

ചാഡ്‌ലി, ബ്രോലി, ആൽഡർവിയറെൽഡ്, ടെലിമാൻസ്, ബെന്റെകി, വെർഷാരെൻ, കാസ്റ്റ്യെൻ എന്നിവരാണു ബാക്കി 7 ഗോളുകൾ സാൻ മാരിനോ വലയിൽ നിറച്ചത്. കളിയുടെ 80–ാം മിനിറ്റ് വരെ ഒരു ഗോളിനു പിന്നിൽ നിന്നിട്ടും 3 ഗോൾ തിരിച്ചടിച്ച ഹോളണ്ട് 3–1നു വടക്കൻ അയർലൻഡിനെ തോൽപിച്ചു. 

മറ്റൊരു യോഗ്യതാ മത്സരത്തിൽ ക്രൊയേഷ്യ 3–0നു ഹംഗറിയെ തോൽപിച്ചു. സ്‍‌ലൊവാക്യ – വെയ്‌ൽസ് മത്സരം സമനിലയിലായി (1–1). റോബർട്ട് ലെവൻഡോവ്‌സ്കിയുടെ ഹാട്രിക് മികവിൽ പോളണ്ട് 3–0നു ലാത്‍വിയയെ മറികടന്നു. ഓസ്ട്രിയ 3–1ന് ഇസ്രയേലിനെ തോൽപിച്ചു.