അതിലും നല്ലത് ഗോൾഫ് കളിക്കാൻ പോകുന്നതല്ലേ: ഗ്വാർഡിയോള

മാഞ്ചസ്റ്റർ ∙ ‘ മാഞ്ചസ്റ്റർ യുണൈറ്റഡിനെ പരിശീലിപ്പിക്കാൻ തയാറാണോ?’ ‘ ഏയ്, അതിലും നല്ലത് ഞാൻ ഈ പണി നിർത്തി ഗോൾഫ് കളിക്കാൻ പോകുന്നതല്ലേ’– പറയുന്നത് മാഞ്ചസ്റ്റർ സിറ്റി പരിശീലകൻ പെപ് ഗ്വാർഡിയോള.

ഓൾഡ് ‌ട്രാഫഡിൽ മാഞ്ചസ്റ്റർ യുണൈറ്റഡിനെതിരെയുള്ള മത്സരത്തിനു മുന്നോടിയായി സംസാരിക്കുകയായിരുന്നു നാൽപത്തിയെട്ടുകാരനായ പെപ്.

‘‘ഇംഗ്ലിഷ് പ്രീമിയർ ലീഗ് ഫുട്ബോളിലെ അയൽവൈരികളാണ് സിറ്റിയും യുണൈറ്റഡുമെന്ന് എല്ലാവർക്കും അറിയാം. ഇത്രയും കാലം സിറ്റിയുടെ ഭാഗമായി നിന്നശേഷം യുണൈറ്റഡിലേക്കു പോകുന്നതിനെക്കുറിച്ച് എനിക്കു ചിന്തിക്കാൻ പോലും വയ്യ.

സ്പെയിനിൽ ബാർസിലോനയെ പരിശീലിപ്പിച്ചിരുന്ന എനിക്ക് റയൽ മഡ്രിഡിന്റെ പരിശീലകനാകുന്ന കാര്യം ചിന്തിക്കാനാകുമോ?. അതുപോലെയാണ് ഇതും. ബദ്ധവൈരികളായ ടീമുകളെ പരിശീലിപ്പിക്കുന്നതിലും നല്ലത് ജോലി ഉപേക്ഷിച്ചു ഗോൾഫ് കളിക്കാൻ പോകുന്നതാണ്’ – ഗ്വാർഡിയോള പറഞ്ഞു.

2007ൽ ബാർസിലോന ബി ടീം പരിശീലകനായി കോച്ചിങ് കരിയർ തുടങ്ങിയ പെപ്, പിന്നീട് ബാർസിലോന സീനിയർ ടീമിനെയും ജർമൻ ക്ലബ് ബയൺ മ്യൂനിക്കിനെയും പരിശീലിപ്പിച്ചശേഷമാണ് മാഞ്ചസ്റ്റർ സിറ്റിയിലെത്തിയത്. ഇംഗ്ലിഷ് പ്രീമിയർ ലീഗ് പട്ടികയിൽ മൂന്നാം സ്ഥാനത്താണ് നിലവിലെ ചാംപ്യൻമാരായ സിറ്റി ഇപ്പോൾ.