ചാംപ്യൻസ് + ചാംപ്യൻസ്; കിരീടവഴിയിൽ തുടരാൻ എടികെ മോഹൻ ബഗാൻ

ഐ ലീഗ് ചാംപ്യൻമാരും ഐഎസ്എൽ ചാംപ്യൻമാരും ഒന്നിച്ചു ചേർന്ന ഒരു ഓൾ സ്റ്റാർ ടീം. അതാണ് എടികെ മോഹൻ ബഗാൻ. എടികെ മോഹൻ ബഗാൻ ലയനത്തിൽനിന്ന് ആരാധകർ പ്രതീക്ഷിക്കുന്നതു കിരീടം മാത്രം.

∙ കൃഷ്ണ-വില്യംസ്

2 ക്ലബ്ബുകൾ ഒന്നിച്ചതിനാൽ അധികം വിദേശ താരങ്ങളെ എത്തിക്കേണ്ടി വന്നില്ല ബഗാന്. റോയ് കൃഷ്ണയും ഡേവിഡ് വില്യംസും ചേർന്ന മുന്നേറ്റനിര ലീഗിലെ ഏറ്റവും മികച്ചത്. സ്കോട്‌ലൻഡ് മിഡ്ഫീൽഡർ ബ്രാഡ് ഇൻമാമിനെ ഓസ്ട്രേലിയൻ എ ലീഗിൽ നിന്നെത്തിച്ചു. ക്ലബ്ബിനു വേണ്ടി മുൻപു കളിച്ചിട്ടുള്ള സ്പാനിഷ് താരം ടിരിയെ ഡിഫൻസിൽ കൂടെക്കൂട്ടി.

∙ പോസ്റ്റർ ബോയ്

വിദേശതാരങ്ങൾക്കൊപ്പം  നിൽക്കുന്ന ഇന്ത്യൻ താരങ്ങളുണ്ട് ടീമിൽ: ഗോൾകീപ്പർ അരിന്ദം ഭട്ടാചാര്യ, മിഡ്ഫീൽഡിൽ മൈക്കൽ സൂസൈരാജ്, പ്രണോയ് ഹാൽദർ. ടിരിക്കൊപ്പം ഡിഫൻസിലേക്കു കൊണ്ടു വന്നയാളാണ് ഇപ്പോൾ ക്ലബ്ബിന്റെ പോസ്റ്റർ ബോയ് - സാക്ഷാൽ സന്ദേശ് ജിങ്കാൻ.  പരുക്കേറ്റ മലയാളി താരം ജോബി ജസ്റ്റിനു പകരം മുന്നേറ്റത്തിൽ മൻവീർ സിങ്ങുമെത്തി.

∙ സൂപ്പർ കോച്ച്

സ്പെയിൻകാരൻ അന്റോണിയോ ലോപസ് ഹബാസിന് ഇന്ത്യൻ ഫുട്ബോളിനെ നന്നായറിയാം. 2 ഐഎസ്എൽ കിരീടങ്ങളുടെ പെരുമയുമുണ്ട്. താരങ്ങളെ പഠിപ്പിക്കാനും കളിപ്പിക്കാനുമറിയാം.

English Summary: ATK Mohun Bagan, ISL 2020-21, Team Analysis