ഇബ്ര–റോണോ; എന്തൊരു ചെറുപ്പം!
Mail This Article
റോം ∙ പോർച്ചുഗലിന്റെ മുപ്പത്തഞ്ചുകാരൻ ക്രിസ്റ്റ്യാനോ റൊണാൾഡോയും സ്വീഡന്റെ മുപ്പത്തിയൊൻപതുകാരൻ സ്ലാട്ടൻ ഇബ്രാഹിമോവിച്ചും തമ്മിൽ ഇറ്റാലിയൻ സീരി എ ഫുട്ബോളിൽ ഗോൾപ്പോര്. യുവെന്റസിനായി സീസണിൽ ഇതുവരെ സീരി എയിൽ റോണോ നേടിയത് 8 ഗോൾ. എസി മിലാൻ കുപ്പായത്തിൽ സ്ലാട്ടന്റെ സമ്പാദ്യവും 8 ഗോൾ.
ടോപ് സ്കോറർ പട്ടികയിൽ ഇരുവരും ഒപ്പത്തിനൊപ്പം. ആദ്യ പകുതിയിൽ ക്രിസ്റ്റ്യാനോ നേടിയ ഇരട്ട ഗോളുകളിലാണു കഴിഞ്ഞ ദിവസം യുവെന്റസ് 2-0നു കാല്യരിയെ തോൽപിച്ചത്. പോർച്ചുഗലിനൊപ്പമുള്ള 3 കളികൾക്കുശേഷം തിരിച്ചെത്തിയ റൊണാൾഡോയുടെ ഗോളുകൾ 38, 42 മിനിറ്റുകളിലായിരുന്നു. ജയത്തോടെ യുവെന്റസ് പോയിന്റ് പട്ടികയിൽ രണ്ടാം സ്ഥാനത്തേക്കു കയറി.
എസി മിലാനാണ് ഒന്നാമത്. ഇന്നലെ രാത്രിയിലെ മത്സരങ്ങൾ കഴിയുമ്പോൾ സ്ഥാനങ്ങൾ മാറിയേക്കാം. മത്സരശേഷം യുവെ കോച്ച് ആന്ദ്രെ പിർലോ ക്രിസ്റ്റ്യാനോയെപ്പറ്റി പറഞ്ഞതിങ്ങനെ: 'ഞങ്ങൾക്ക് ഈ ചെറുപ്പക്കാരനെ ഇതേ ഫോമിൽ നിലനിർത്തേണ്ടതാവശ്യമാണ്.'