സിറ്റിയുടെ കപ്പ്; പെപ്പിന്റെയും!

13 വർഷം മുൻപ് അബുദാബിയിൽനിന്നു പണമൊഴുകിയെത്തും വരെ മാഞ്ചസ്റ്റർ സിറ്റി ഇംഗ്ലണ്ടിലെ ഒരു സാധാരണ ക്ലബ്ബായിരുന്നു. കഴിഞ്ഞ നൂറ്റാണ്ടിൽ 2 ലീഗ് കിരീടങ്ങൾ (1937, 1968) നേടിയതൊഴിച്ചാൽ 1999 വരെ 3–ാം ഡിവിഷനിൽ കളിച്ച ക്ലബ്. ആ മാഞ്ചസ്റ്റർ സിറ്റിയാണിപ്പോൾ 5 വർഷത്തിനിടെ 3 പ്രീമിയർ ലീഗ് കിരീടങ്ങളുമായി ഇംഗ്ലിഷ് ഫുട്ബോളിലെ കിരീടം വച്ച രാജാക്കന്മാരായി തലയുയർത്തി നിൽക്കുന്നത്. 

അബുദാബി ബിസിനസ് ഗ്രൂപ്പ് വൻതോതിൽ പണമൊഴുക്കിയതു കൊണ്ടുമാത്രമല്ല മാഞ്ചസ്റ്റർ സിറ്റിയുടെ ഈ നേട്ടം. സമീപകാലത്തു സിറ്റി സ്വന്തമാക്കിയ കിരീടങ്ങൾക്കെല്ലാം ജോസഫ് പെപ് ഗ്വാർഡിയോള എന്ന സ്പാനിഷ് കോച്ചിനോടും ക്ലബ് കടപ്പെട്ടിരിക്കുന്നു. 

സ്പാനിഷ് ക്ലബ് ബാർസിലോനയിലും ജർമൻ ക്ലബ് ബയൺ മ്യൂണിക്കിലും കിരീടവിജയങ്ങൾ ശീലമാക്കിയ ശേഷം മാഞ്ചസ്റ്ററിലെത്തിയ ഗ്വാർഡിയോളയുടെ വിജയം കൂടിയാണിത്. 2016ലാണു ഗ്വാർഡിയോള സിറ്റിയുടെ പരിശീലകനായത്. ആ വർഷം കിരീടമൊന്നും നേടാനായില്ലെങ്കിലും പിറ്റേവർഷം സിറ്റി ഇംഗ്ലണ്ടിൽ ലീഗ് ജേതാക്കളായി. 

2018–19 സീസണിൽ ആഭ്യന്തര തലത്തിൽ ട്രിപ്പിൾ കിരീടം. 2020 സീസണിൽ ലിവർപൂളിന്റെ മികവിനു മുന്നിൽ മാത്രം തോൽക്കേണ്ടി വന്ന സിറ്റി ഈ വർഷം തുടക്കത്തിൽ പതറിയ ശേഷമാണു തിരിച്ചുവന്നത്. ഈ വർഷം സിറ്റിക്ക് ഒരു അപൂർവ ട്രിപ്പിളിനു കൂടി യോഗമുണ്ട്.

29നു ചാംപ്യൻസ് ലീഗ് ഫൈനലിൽ ചെൽസിയെ തോൽപിച്ചാൽ സീസണിൽ സിറ്റിക്കു 3 കിരീടങ്ങൾ; ലീഗ് കപ്പ്, പ്രീമിയർ ലീഗ്, പിന്നെ യൂറോപ്യൻ കിരീടവും! ചാംപ്യൻസ് ലീഗ്  നേടാനായിട്ടില്ലെന്നതാണു സിറ്റിയുടെ ഏക സങ്കടം. ഈ വർഷം അതിനും ഗ്വാർഡിയോള പരിഹാരം കണ്ടേക്കും. 

Content Highlight: Pep Guardiola