സ്വീഡിഷ് ഫോഴ്സ്!; സ്ലൊവൊക്യയെ വീഴ്ത്തി സ്വീഡൻ
Mail This Article
സെന്റ് പീറ്റേഴ്സ്ബർഗ് ∙ ഒപ്പത്തിനൊപ്പം പോരാടിയ സ്വീഡനെയും സ്ലൊവാക്യയെയും വേർതിരിക്കാൻ ഒടുവിൽ ഒരു പെനൽറ്റി കിക്ക് വേണ്ടി വന്നു. 77-ാം മിനിറ്റിൽ എമിൽ ഫോസ്ബർഗ് നേടിയ പെനൽറ്റി ഗോളിൽ സ്ലൊവാക്യയെ 1-0നു തോൽപിച്ച് സ്വീഡൻ 4 പോയിന്റോടെ ഗ്രൂപ്പ് ഇയിൽനിന്ന് നോക്കൗട്ട് പ്രതീക്ഷ സജീവമാക്കി.
തോറ്റെങ്കിലും സ്ലൊവാക്യയ്ക്കും പ്രതീക്ഷയുണ്ട്. 3 പോയിന്റോടെ 2-ാം സ്ഥാനത്തുണ്ട് അവർ. ആദ്യ കളിയിൽ സ്പെയിനെതിരെ പ്രതിരോധ ഫുട്ബോൾ കളിച്ച സ്വീഡൻ ഇത്തവണ ആക്രമിച്ചു കളിച്ചു. വിജയഗോൾ നേടിയത് ഫോസ്ബർഗാണെങ്കിലും സ്പാനിഷ് ക്ലബ് റയൽ സോസിദാദിൽ കളിക്കുന്ന സ്വീഡന്റെ 11-ാം നമ്പർ താരം അലക്സാണ്ടർ ഇസാകാണ് സ്ലൊവാക്യയെ വിറപ്പിച്ചത്.
മധ്യവരയ്ക്കടുത്തുനിന്ന് 4 സ്ലൊവാക്യൻ ഡിഫൻഡർമാരെ വെട്ടിച്ചു മുന്നേറി ഇസാക് പായിച്ച ഷോട്ട് ഗോൾകീപ്പർ മാർട്ടിൻ ദുബ്രാവ്ക സേവ് ചെയ്തില്ലായിരുന്നെങ്കിൽ ഈ യൂറോയിലെ മികച്ച ഗോളുകളിലൊന്ന് പിറന്നേനെ. ഒടുവിൽ 2-ാം പകുതിക്കു മധ്യേ സ്വീഡൻ കാത്തിരുന്ന നിമിഷം. പകരക്കാരൻ റോബിൻ ക്വെയ്സനെ ദുബ്രാവ് വീഴ്ത്തിയതിന് സ്വീഡനു പെനൽറ്റി. ഇത്തവണ ഫോസ്ബർഗിനു പിഴച്ചില്ല.
English Summary: Euro cup football - Sweden vs Slovakia match