വാസ്കോ തിലക് മൈതാനിയിൽ ഒഡീഷ എഫ്സിക്ക് എതിരായ ഐഎസ്എൽ പോരാട്ടം. 25–ാം മിനിറ്റിൽ ബോക്സിലേക്ക് നീട്ടിക്കിട്ടിയ പന്തിനെ ഒന്ന് വെട്ടിത്തിരിഞ്ഞ് കേരള ബ്ലാസ്റ്റേഴ്സ് ഗോൾ മുഖത്തേക്ക് തീയുണ്ട പോലെ പായിക്കുന്ന ഒഡീഷയുടെ സ്പാനിഷ് താരം ഹാവി ഹെർണാണ്ടസ്. ഗോൾ എന്നുറപ്പിച്ച നിമിഷം. പക്ഷേ ഒഡീഷയ്ക്കു തെറ്റി. ഗോൾ മുഖത്ത് അചഞ്ചലനായി ഒരു കില്ലാടി കാത്ത് നിൽപ്പുണ്ടെന്ന് അവർ മറന്നു. പ്രഭ്സുഖൻ ഗിൽ എന്ന 21 കാരൻ. ബോൾ തട്ടിയകറ്റിയ ഗിൽ ഇതൊക്കെയെന്ത് എന്ന ഭാവത്തിൽ ബാറിനു താഴെ അടുത്ത ഷോട്ട് പ്രതീക്ഷിച്ചു കാത്തുനിന്നു.
