കോവിഡ്; 2023 എഎഫ്സി ഏഷ്യൻ കപ്പ് ആതിഥേയത്വത്തിൽനിന്ന് ചൈന പിന്മാറി!

ബെയ്ജിങ്∙ 2023ലെ എഎഫ്സി ഏഷ്യൻ കപ്പ് ഫുട്ബോളിന് ആതിഥ്യമരുളാനുള്ള അവകാശം ചൈന ഉപേക്ഷിച്ചതായി ഏഷ്യൻ ഫുട്ബോൾ കോൺഫെഡറേഷൻ പ്രഖ്യാപിച്ചു. രാജ്യത്തെ കോവിഡ് കേസുകളിൽ ഉണ്ടായ വർധനയെ തുടർന്നാണു നടപടി. ഏഷ്യയിൽനിന്നുള്ള 24 ടീമുകൾ പങ്കെടുക്കുന്ന ടൂർണമെന്റ്, അടുത്ത വർഷം ജൂൺ 16 മുതൽ ജൂലായ് 16 വരെ നടത്താനാണു നിശ്ചയിച്ചിരുന്നത്. 

‘ചൈന്നീസ് ഫുട്ബോൾ അസോസിയേഷനുമായി ദീർഘനേരം നീണ്ടുനിന്ന ചർച്ചകൾക്കു ശേഷമാണ്, അടുത്ത വർഷം നടക്കാനിരിക്കുന്ന ടൂർണമെന്റിന് ആതിഥ്യമരുളാൻ സാധിക്കില്ലെന്ന് ചൈന അറിയിച്ചത്’– കോൺഫെഡറേഷൻ വാർത്താക്കുറിപ്പിറക്കി. ഖത്തർ ആയിരുന്നു 2019ൽ നടന്ന ടൂർണമെന്റിലെ ജേതാക്കൾ. 

കോവിഡ് പ്രതിസന്ധി നിലനിൽക്കുന്ന സവിശേഷ സാഹചര്യത്തെക്കുറിച്ച് എഎഫ്സിക്കു ബോധ്യമുണ്ട്. ഇതുമൂലമാണു ചൈന ആതിഥേയ അവകാശം ഒഴിയുന്നത്. ചൈനയ്ക്കു പകരം ഏതു രാജ്യം ആതിഥേയത്വം ഏറ്റെടുക്കുമെന്നുള്ളത് അടക്കമുള്ള കാര്യങ്ങളിൽ പിന്നീടു തീരുമാനമെടുക്കുമെന്നും കോൺഫെഡറേഷൻ അറിയിച്ചിരുന്നു.

സെപ്റ്റംബറിൽ ചൈനയിൽ നടത്താനിരുന്ന ഏഷ്യൻ ഗെയിംസും, കോവിഡിനെ തുടർന്ന് സംഘാടകർ നേരത്തേ മാറ്റിവച്ചിരുന്നു. കോവിഡ് കേസുകളിൽ വർധന തുടരുന്നതിനാൽ, ചൈനയിലെ പല നഗരങ്ങളും ഇപ്പോഴും ലോക്ഡൗണിലാണ്. 

English Summary: China withdraw as AFC Asian Cup 2023 hosts