സൗഹൃദ സന്നാഹം!

ഫ്ലോറിഡ (യുഎസ്) ∙ ഖത്തർ ഫുട്ബോൾ ലോകകപ്പിനു മുന്നോടിയായുള്ള സന്നാഹ മത്സരങ്ങളിൽ അർജന്റീനയും ബ്രസീലും വൻവിജയമാഘോഷിച്ചു. ബ്രസീൽ 3-0ന് ഘാനയെയും അർജന്റീന ഇതേ സ്കോറിനു ഹോണ്ടുറാസിനെയും തോൽപിച്ചു. 12 മിനിറ്റിനിടെ വിങ്ങർ റിച്ചാർലിസൻ നേടിയ 2 ഗോളുകളാണു ബ്രസീലിന്റെ വിജയം അനായാസമാക്കിയത്. 

ഹോണ്ടുറാസിനെ പൊരുതാൻ അനുവദിക്കാതെ വീഴ്ത്തുകയായിരുന്നു അർജന്റീനയും. 16-ാം മിനിറ്റിൽ ഇന്റർ മിലാൻ സ്ട്രൈക്കർ ലൗറ്റാരോ മാർട്ടിനസ് അർജന്റീനയുടെ ആദ്യ ഗോൾ നേടി. ആദ്യ പകുതിയുടെ ഇൻജറി ടൈമിൽ (45+2) പെനൽറ്റി കിക്കിലൂടെ ക്യാപ്റ്റൻ ലയണൽ മെസ്സി ലീഡുയർത്തി. 69-ാം മിനിറ്റിലെ ഗോളിൽ മെസ്സി ഡബിളും തികച്ചതോടെ അർജന്റീനയ്ക്ക് 3–0 ജയം. 

ഇംഗ്ലണ്ടിനെ വീഴ്ത്തി ഇറ്റലി 

മിലാൻ ∙ യുവേഫ നേഷൻസ് ലീഗ് ഫുട്ബോളിൽ ഇറ്റലിയോട് 0–1നു തോറ്റ ഇംഗ്ലണ്ട് രണ്ടാംനിര ലീഗിലേക്കു തരംതാഴ്ത്തപ്പെട്ടു.  ലീഗ് എ ഗ്രൂപ്പ് മൂന്നിലെ മറ്റൊരു മത്സരത്തിൽ ഹംഗറി 1-0നു ജർമനിയെ തോൽപിച്ചു.  പോയിന്റ് നിലയിൽ ഹംഗറി ഒന്നാമതെത്തി. 

English Summary: Football roundup: Brazil, Argentina win friendlies