അടവുകൾ പരുക്കൻ: കളിയുടയ്ക്കാന് ‘ചവിട്ട്’: ഖത്തറിലും ഫൗൾ റെക്കോർഡിന് നെയ്മാർ?
Mail This Article
നെയ്മാർ നോക്കൗട്ടിൽ തുടർന്നും കളിക്കും എന്നു ടിറ്റെ ഉറപ്പിച്ചു പറയുമ്പോഴും ആരാധകരുടെ ആശങ്ക അവസാനിക്കാത്തതിനുള്ള കാരണവും നെയ്മാറിന്റെ ഈ ഭൂതകാലംതന്നെ. കഴിഞ്ഞ റഷ്യൻ ലോകകപ്പിൽ ഏറ്റലും അധികം ഫൗളുകൾക്കു വിധേയനായ താരം നെയ്മാറാണ്. 26 തവണ. ഖത്തറിലെ ഉദ്ഘാടന മത്സരത്തിൽ 9 വട്ടമാണു സെർബിയൻ താരങ്ങൾ നെയ്മാറെ ഫൗൾ ചെയ്തു വീഴ്ത്തിയത്. ഇനി പാരിസ് സെയ്ന്റ് ജെർമെയ്നിലേക്കു വന്നാലോ? 2018 സീസൺ മുതൽ ഈ ലോകകപ്പിന്റെ തുടക്കം വരെ പരുക്കിനെത്തുടർന്നു നെയ്മാർക്കു പിഎസ്ജിയിൽ നഷ്ടമായ മത്സരങ്ങൾ എത്രയെന്നറിയാമോ? നൂറിലും അധികം. യൂറോപ്പിലെ ഏറ്റവും മികച്ച 5 ഫുട്ബോൾ ലീഗുകളിലെ താരങ്ങളിൽ, 2016നു ശേഷം ഏറ്റവും അധികം തവണ ഫൗളുകൾക്കു വിധേയനായ താരം നെയ്മാറാണെന്ന് ബീസോക്കർ പ്രോ വെബ്സൈറ്റ് കഴിഞ്ഞ ഫെബ്രുവരിയിൽ നടത്തിയ സർവേയിൽ കണ്ടെത്തിയിരുന്നു. സർവേ റിപ്പോർട്ട് പ്രകാരം 2016നു ശേഷം 1040 തവണ നെയ്മാർ ഫൗൾ ചെയ്യപ്പെട്ടു. പിഎസ്ജിയിലെ നെയ്മാറുടെ അർജന്റൈൻ സഹതാരം ലയണൽ മെസ്സിയാണ് (829) രണ്ടാം സ്ഥാനത്ത്. ആന്ദ്രേ ബെലോറ്റി (ടോറിനോ), ജാക്ക് ഗ്രിയാലിഷ് (മാഞ്ചസ്റ്റർ സിറ്റി– ഇരുവരും 747) എന്നിവർ മൂന്നാമതും. എന്തുകൊണ്ടാകും നെയ്മാർക്കു മാത്രം സ്ഥിരമായി ഈ ദുർവിധി?