പിടികിട്ടാതെ ‘മാജിക്കൽ’ കുതിപ്പ്, മെസ്സി മാസ്; കളത്തിൽ ഉജ്വല കെമിസ്ട്രി: അർജന്റീന ക്ലാസ്!

ആദ്യത്തെ ഫ്രെയിമിൽ ഒരൊറ്റയാൾ മാത്രം. ലയണൽ മെസ്സി. ആദ്യ പകുതിയിൽ പെനൽറ്റി തുലച്ച മെസ്സിയല്ല. 53–ാം മിനിറ്റിലെ ഒറ്റയാൾ നീക്കത്തിൽനിന്ന് 6 താരങ്ങളെ വെട്ടിയൊഴിഞ്ഞ്, വേഗം ഏറ്റിയും കുറച്ചും, ഒടുക്കം പോളിഷ് ബോക്സിനുള്ളിലേക്കു വരെ പന്തുമായി മുന്നേറിയ മെസ്സിയുടെ റൺ. ഉഗ്രപ്രതാപകാലത്ത് ബാർസിലോന– അർജന്റീന ജഴ്സികളിൽ പലതവണ കണ്ടിട്ടുള്ള അതി മനോഹര നിമിഷങ്ങളുടെ പുനരാവിഷ്കരണം 35–ാം വയസ്സിൽ വീണ്ടും! രണ്ടാമത്തെതിൽ, ഇതേ മെസ്സി വെറും കാഴ്ചക്കാരന്റെ റോളിലാണ്. മത്സരത്തിന്റെ 67–ാം മിനിറ്റ്. സ്കോറർ ജൂലിയൻ ആൽവാരെസ് ആണെങ്കിലും സ്കോറിങ്ങിലെ ‘അർജന്റൈൻ’ ചാരുതയാണ് ഇവിടെ ഹൈലൈറ്റ്. ബോക്സിനു പുറത്ത് പല തവണ പന്തുകൾ മറിച്ച്, പ്രതിരോധത്തിന്റെ വിടവുകൾ നോക്കി ബോക്സിലേക്കു ചാട്ടുളി കണക്കെ പാഞ്ഞുകയറിയുള്ള ടിപ്പിക്കൽ ഫിനിഷ്. ഗോളിലേക്കു വഴി മരുന്നിട്ട നീക്കങ്ങളിൽ മെസ്സിയുടെ ടച്ച് ഇല്ല. പ്രതിരോധവും മധ്യനിരയും സ്ട്രൈക്കർമാരും എണ്ണയിട്ട യന്ത്രം പോലെ കറങ്ങുന്ന അർജന്റീനയുടെ ടീം ഗെയിം. എതിരാളികളെ ‘വിഴുങ്ങിക്കളയുന്ന’ അതേ ടീം ഗെയിം.