കോഴിക്കോട് ∙ സ്ട്രൈക്കർ സെർജിയോ മെൻഡി നേടിയ ഗോളിൽ കെങ്കരെ എഫ്സിയെ 1–0ന് തോൽപിച്ച് ഗോകുലം കേരള എഫ്സി ഐ ലീഗ് പോയിന്റ് പട്ടികയിൽ മൂന്നാം സ്ഥാനത്തേക്കു കയറി. 21–ാം മിനിറ്റിൽ വികാസ് സിങ് സെയ്നിയുടെ അസിസ്റ്റിൽ നിന്ന് ഹെഡറിലൂടെയാണ് സ്പാനിഷ് താരം മെൻഡി ലക്ഷ്യം കണ്ടത്. മെൻഡിയാണ് പ്ലെയർ ഓഫ് ദ് മാച്ച്. ജയത്തോടെ ഗോകുലത്തിന് 13 കളികളിൽ 24 പോയിന്റായി.

17–ാം മിനിറ്റിൽ കെങ്കരെയുടെ കിരൺ പന്ഥാരെ മഞ്ഞക്കാർഡ് കണ്ടതു മുതൽ മത്സരത്തിൽ കാർഡുകളുടെ ഘോഷയാത്രയായിരുന്നു. 56–ാം മിനിറ്റിൽ രണ്ടാം മഞ്ഞക്കാർഡ് കണ്ട് രാഹുൽ രാജു പുറത്തായതിനു ശേഷം 10 പേരുമായാണ് ഗോകുലം പൊരുതി നിന്നത്. 

ഗോളി ഷിബിൻരാജിന്റെ സേവുകളും ക്യാപ്റ്റൻ അമിനോ ബൗബയുടെ നേതൃത്വത്തിലുള്ള പ്രതിരോധനിരയുടെ ചെറുത്തുനിൽപും ഗോകുലത്തെ കാത്തു. ഫെബ്രുവരി 5ന് ഇംഫാലിൽ നെറോക്ക എഫ്സിക്കെതിരെയാണ് ഗോകുലത്തിന്റെ അടുത്ത മത്സരം.

English summary: I League win for Gokulam Kerala FC