ഫ്ലോറിഡ ∙ ‌അർജന്റീനയുടെ സൂപ്പർ താരം ലയണൽ മെസ്സി ഫ്ലോറിഡയിൽ പുതിയ ആഡംബര ബംഗ്ലാവ് സ്വന്തമാക്കി. ഫോർട്ട് ലൗഡർഡെയ്‌ലിലെ ജലാശയത്തിനു മുന്നിലുള്ള ബംഗ്ലാവ്‌ 10.75 ദശലക്ഷം ഡോളറിനാണ് (ഇന്ത്യൻ രൂപ ഏകദേശം 89.2 കോടി) മെസ്സി വാങ്ങിയത്. 10,500 ചതുശ്രയടി വിസ്തീര്‍ണമുള്ള വീട്ടിനുള്ളിൽ 8 ബെഡ്‌ റൂമും ഇറ്റാലിയൻ സ്റ്റൈൽ കിച്ചനുമാണുള്ളത്. കൂടാതെ വീടിന് അനുബന്ധമായി മൂന്ന് കാർ ഗാരിജുകളും സ്വിമ്മിങ് പൂളുമുണ്ട്.   

ഇക്കഴിഞ്ഞ ജൂണിലാണ് പിഎസ്ജിയിൽനിന്ന് അമേരിക്കൻ ക്ലബ്ബായ ഇന്റർ മയാമിയിലേക്ക് മെസ്സി എത്തിയത്. സെപ്റ്റംബർ 17നാണ് ഇന്റർ മയാമിയുടെ അടുത്ത മേജർ ലീ​ഗ് സോക്കർ (എംഎൽഎസ്) മത്സരം. മേജർ ലീ​ഗിൽ ആറാം സ്ഥാനത്ത് നിൽക്കുന്ന അത്‌ലാന്റ യുണൈറ്റഡാണ് എതിരാളികൾ. എംഎൽഎസിൽ ഇന്റർ മയാമി 14-ാം സ്ഥാനത്ത് തുടരുകയാണ്. അവശേഷിക്കുന്ന എട്ട് മത്സരങ്ങളിൽനിന്ന് ആദ്യ ഒൻപതിൽ എത്തിയാൽ മാത്രമേ മയാമിക്ക് അടുത്ത റൗണ്ടിൽ പ്രവേശിക്കാനാവൂ.

English Summary: Lionel Messi buys a $10.75 million mansion in Florida