ഓസ്‌ലോ ∙ അടുത്ത വർഷം ജർമനിയിൽ നടക്കുന്ന യൂറോ കപ്പ് ഫുട്ബോളിന് ടിക്കറ്റെടുത്ത് സ്പെയിൻ, സ്കോട്‌ലൻഡ്, തുർക്കി ടീമുകൾ. നോർവേയെ 1–0നു തോൽപിച്ചാണ് സ്പെയിൻ യോഗ്യത ഉറപ്പിച്ചത്. 49–ാം മിനിറ്റിൽ ബാർസിലോന താരം ഗാവിയാണ് ഗോൾ നേടിയത്. സ്പെയിനിന്റെ ജയം സ്കോട്‌ലൻഡിനും തുണയായി. 15 പോയിന്റുമായി എ ഗ്രൂപ്പിൽ രണ്ടാമതുള്ള അവരെ മറികടക്കാൻ ഇനി നോർവേയ്ക്കാവില്ല. ഡി ഗ്രൂപ്പ് മത്സരത്തിൽ ലാത്‌വിയയെ 4–0നു തകർത്താണ് തുർക്കി യോഗ്യത നേടിയത്. 16 പോയിന്റുമായി ഗ്രൂപ്പിൽ ഒന്നാം സ്ഥാനം തുർക്കി ഉറപ്പിച്ചു.