പിന്നിൽ നിന്നും തിരിച്ചടിച്ച് ബെംഗളൂരുവിനെ വീഴ്ത്തി ഒഡീഷ; ഡിയേഗോ മൗറീഷ്യയ്‌ക്ക് ഇരട്ടഗോൾ

ബെംഗളൂരു ∙ ഐഎസ്എൽ ഫുട്ബോളിൽ ബെംഗളൂരു എഫ്സിക്കെതിരെ ഒഡീഷ എഫ്സിക്ക് ജയം (3–2). കളി തുടങ്ങി 13 മിനിറ്റിനകം 0–2നു പിന്നിലായ ശേഷമായിരുന്നു ഒഡീഷയുടെ തിരിച്ചടി. ഡിയേഗോ മൗറീഷ്യയുടെ ഇരട്ട ഗോളുകളാണ് ഒഡീഷ വിജയത്തിൽ നിർണായകമായത്. പെനൽറ്റിയിലൂടെയായിരുന്നു 28, 39 മിനിറ്റുകളിലെ ഗോളുകൾ. 50–ാം മിനിറ്റിൽ‍ മാവിമിങ്താംഗയാണ് വിജയഗോൾ നേടിയത്.

എഡ്ഗാർ മെൻഡസ് (10), സുനിൽ ഛേത്രി (13) എന്നിവരുടെ ഗോളുകളിലാണ് കളിയുടെ തുടക്കത്തിൽ ബെംഗളൂരു രണ്ടു ഗോളിനു മുന്നിലെത്തിയത്. 11 ഗോളുകളോടെ ടോപ് സ്കോറർ പട്ടികയിൽ രണ്ടാമനാണ് ഛേത്രി. 15 ഗോളുകൾ നേടിയ നോർത്ത് ഈസ്റ്റ് യുണൈറ്റ‍ഡിന്റെ മൊറോക്കൻ താരം അലാദ്ദീൻ അജാരെയാണ് ഒന്നാമത്. പോയിന്റ് പട്ടികയിൽ ബെംഗളൂരു മൂന്നാമതും ഒഡീഷ 6–ാം സ്ഥാനത്തുമാണ്.