2030 ഫിഫ ലോകകപ്പിൽ 64 ടീമുകൾക്ക് സാധ്യത

പാരിസ് ∙ ഫുട്ബോൾ ലോകകപ്പിന്റെ 100–ാം വാർഷിക ചാംപ്യൻഷിപ് നടക്കുന്ന 2030ൽ പങ്കെടുക്കുന്ന ടീമുകളുടെ എണ്ണം 64 ആക്കി വർധിപ്പിക്കാൻ ആലോചന.  മൊറോക്കോ, സ്പെയിൻ, പോർച്ചുഗൽ, അർജന്റീന, പാരഗ്വായ്, യുറഗ്വായ് എന്നിവിടങ്ങളിലായാണ് 2030 ലോകകപ്പ് നടക്കുക.

കഴിഞ്ഞ ദിവസം നടന്ന ഫിഫ കൗൺസിലിലാണ് ഇതേക്കുറിച്ച് ആലോചന വന്നത്. 64 ടീമുകളുടെ ലോകകപ്പ് നടത്തിയാലുള്ള സാമ്പത്തിക നേട്ടം ഉൾപ്പെടെയുള്ള കാര്യങ്ങളെക്കുറിച്ചു പഠിച്ച ശേഷമാകും അന്തിമ തീരുമാനം. ഖത്തറിൽനടന്ന കഴിഞ്ഞ ലോകകപ്പിൽ വരെ 32 ടീമുകളാണു പങ്കെടുത്തത്. യുഎസ്, മെക്സിക്കോ, കാനഡ എന്നിവിടങ്ങളിലായി നടക്കുന്ന അടുത്ത ലോകകപ്പിൽ ടീമുകളുടെ എണ്ണം 48 ആക്കി വർധിപ്പിച്ചിരുന്നു.