നോട്ടിങ്ങാമിനു സമനില; ചാംപ്യൻസ് ലീഗ് പ്രതീക്ഷ മങ്ങി

 ലണ്ടൻ ∙ ഇംഗ്ലിഷ് പ്രിമിയർ ലീഗ് ഫുട്ബോളിൽ ക്രിസ്റ്റൽ പാലസുമായി 1–1 സമനില വഴങ്ങിയ നോട്ടിങ്ങാം ഫോറസ്റ്റിന്റെ ചാംപ്യൻസ് ലീഗ് മോഹങ്ങൾ മങ്ങി. സീസണിൽ എറെക്കാലത്തും പോയിന്റ് പട്ടികയിൽ 3–ാം സ്ഥാനത്തുണ്ടായിരുന്ന നോട്ടിങ്ങാം ഫോറസ്റ്റിനു കഴിഞ്ഞ 5 മത്സരങ്ങളിലെ മോശം പ്രകടനമാണ് തിരിച്ചടിയായത്. 5 കളികളിൽ ഒന്നിൽ മാത്രമാണു ഫോറസ്റ്റിനു ജയിക്കാനായത്; 3 എണ്ണം തോറ്റു. 60–ാം മിനിറ്റിൽ എബരേച്ചി എസിയുടെ പെനൽറ്റി ഗോളിൽ, ആതിഥേയരായ ക്രിസ്റ്റൽ പാലസ് 1–0 ലീഡെടുത്തു. 4 മിനിറ്റിനകം മറ്റൊരു പെനൽറ്റിയിൽനിന്ന് ബ്രസീൽ താരം മുരിലോ നോട്ടിങ്ങാമിനായി സ്കോർ ചെയ്തു (1–0). 

ഈ മത്സരം ജയിച്ചിരുന്നെങ്കിൽ നോട്ടിങ്ങാം ഫോറസ്റ്റിനു പോയിന്റ് നില മെച്ചപ്പെടുത്തി ചാംപ്യൻസ് ലീഗ് സാധ്യതാമേഖലയിൽ എത്താമായിരുന്നു.  61 പോയിന്റുമായി 6–ാം സ്ഥാനത്താണിപ്പോൾ നോട്ടിങ്ങാം ഫോറസ്റ്റ്. ചെൽസി (63 പോയിന്റ്; 5–ാം സ്ഥാനം), ന്യൂകാസിൽ (63, 4–ാം സ്ഥാനം), മാഞ്ചസ്റ്റർ സിറ്റി (64– 3–ാം സ്ഥാനം) എന്നിവ നോട്ടിങ്ങാമിനെക്കാൾ ചെറിയ പോയിന്റ് വ്യത്യാസത്തിൽ മെച്ചപ്പെട്ട സ്ഥാനങ്ങളിലുണ്ട്.