പിഎസ്ജി ആരാധകരുടെ വിജയാഘോഷം അതിരുവിട്ടു; പാരിസിൽ 2 പേർക്ക് ദാരുണാന്ത്യം, 192 പേർക്ക് പരുക്ക്

പാരിസ് ∙ പിഎസ്ജി ആരാധകരുടെ വിജയാഘോഷം അതിരുവിട്ടതോടെ പാരിസിൽ 2 പേർ മരിച്ചു. 192 പേർക്കു പരുക്കേറ്റു. ചാംപ്യൻസ് ലീഗ് വിജയത്തിനു പിന്നാലെ ശനിയാഴ്ച രാത്രി പാരിസിലും ഫ്രാൻസിലെ വിവിധയിടങ്ങളിലും വലിയ ആഘോഷമാണു നടന്നത്. ആരാധകരുടെ അക്രമത്തിൽ കുത്തേറ്റാണ് ഒരു കൗമാരക്കാരൻ മരിച്ചത്.

മറ്റൊരു ഇരുപതുകാരന് ആൾക്കൂട്ടത്തിലേക്കു വാഹനം ഇടിച്ചുകയറിയുണ്ടായ അപകടത്തിൽ ജീവൻ നഷ്ടമായി. അക്രമികളായ അഞ്ഞൂറോളം പേരെ വിവിധ സ്ഥലങ്ങളിൽ അറസ്റ്റ് ചെയ്തതായി ഫ്ര‍ഞ്ച് പൊലീസ് അധികൃതർ അറിയിച്ചു.

കൂടുതൽ അനിഷ്ട സംഭവങ്ങൾ ഒഴിവാക്കാൻ, പാരിസിൽ ഞായറാഴ്ച നടന്ന ട്രോഫി പരേഡിനു കർശന സുരക്ഷയാണ് ഏർപ്പെടുത്തിയിരിക്കുന്നത്.