ഇന്ത്യ ഓപ്പൺ ബാഡ്മിന്റനിൽ സിന്ധു, ശ്രീകാന്ത്, പ്രണോയ് ക്വാർട്ടറിൽ

ന്യൂഡൽഹി ∙ ഇന്ത്യ ഓപ്പൺ ബാഡ്മിന്റനിൽ മുൻ ജേതാക്കളായ പി.വി. സിന്ധു, കെ. ശ്രീകാന്ത് എന്നിവർ ക്വാർട്ടർ ഫൈനലിൽ. മുൻ ലോക രണ്ടാം നമ്പർ ഡെന്മാർക്കിന്റെ യാൻ ജോർജെൻസണിനെ വാശിയേറിയ പോരാട്ടത്തിൽ കീഴടക്കിയ എച്ച്. എസ്. പ്രണോയിയുടേതായിരുന്നു ഇന്നലത്തെ മിന്നുന്ന പ്രകടനം (21-19, 20-22, 21-17). ഇന്ത്യൻ താരങ്ങളായ ബി. സായ് പ്രണീതും പി. കശ്യപും ക്വാർട്ടർ ഫൈനലിൽ കടന്നു.

ഹോങ്കോങ്ങിന്റെ ‍െഡങ് ജോയ് സുവാനെ 21–11, 21–13നു തോൽപിച്ചാണ് സിന്ധുവിന്റെ കുതിപ്പ്. ശ്രീകാന്ത് ചൈനയുടെ ലു ഗുവാങ്സുവിനെ 21-11 21-16നു തോൽപിച്ചു. ഇന്ത്യക്കാർ തമ്മിൽ നടന്ന പോരാട്ടത്തിൽ സമീർ വർമയെ 18-21 21-16 21-15നു കീഴടക്കിയാണ് സായ് പ്രണീത് ക്വാർട്ടറിലെത്തിയത്. ശ്രീകാന്താണ് സായുടെ അടുത്ത എതിരാളി.