പൊന്നുമേരിയാകട്ടെ !ലോക ബോക്സിങ് ചാംപ്യൻഷിപ്പിൽ മേരി കോമിന് ഇന്ന് സെമി

മോസ്കോ (റഷ്യ) ∙ ലോക വനിതാ ബോക്സിങ് ചാംപ്യൻഷിപ്പിൽ ഇന്ത്യയുടെ സുവർണതാരം എം.സി. മേരികോമിന് ഇന്നു സെമി പരീക്ഷ. ലോക ചാംപ്യൻഷിപ്പിൽ സെമിയിലെത്തി കരിയറിലെ തന്റെ 8–ാം ലോക മെഡൽ ഉറപ്പിച്ച മേരി റെക്കോർഡ് പുസ്തകത്തിൽ ഇടംപിടിച്ചു കഴിഞ്ഞു.

51 കിലോ ഫ്ലൈവെയ്റ്റ് വിഭാഗത്തിൽ ഇന്നു തോറ്റാലും മേരിക്കു വെങ്കല മെഡൽ ഉറപ്പാണ്. സെമിയിൽ തുർക്കിയുടെ ബുസെനാസ് കാകിറോഗ്‍ലുവിനെ തോൽപിച്ചു ഫൈനലിൽ കടന്നാൽ സ്വർണമോ വെള്ളിയോ ഉറപ്പ്. ഈസ്റ്റ് സൈബീരിയയിൽ പ്രാദേശിക സമയം ഉച്ചയ്ക്ക് ഒന്നിനാണു സെമി (ഇന്ത്യൻ സമയം രാവിലെ 10.30). യു ട്യൂബിൽ കാണാം.

എം.സി. മേരി കോം (ഇന്ത്യ)

വയസ്സ്: 36

മൂന്നാം സീഡ്

6 ലോക സ്വർണ 

മെഡലുകൾ സ്വന്തം‌

ഒളിംപിക്സ് വെങ്കല ജേതാവ്

ബുസെനാസ് കാകിറോഗ്‍ലു (തുർക്കി)

വയസ്സ്: 23 

രണ്ടാം സീഡ്‌

യൂറോപ്യൻ ചാംപ്യൻഷിപ്പിൽ സ്വർണം

യൂറോപ്യൻ ഗെയിംസിൽ സ്വർണം