ലോക ചെസിന്റെ മലയാളി അംബാസഡർ

അനാഥനായൊരു പയ്യൻ പ്രൈമറി സ്കൂൾ തലത്തിൽതന്നെ വിദ്യാഭ്യാസം അവസാനിപ്പിക്കുന്നു. പിന്നീടു കാലിക്കറ്റ് സർവകലാശാലയിൽ ഒരു പമ്പ് ഓപ്പറേറ്ററുടെ ജോലി നേടിയെടുക്കുന്നു. കോഴിക്കോട് വലിയങ്ങാടി വാടിയിൽ പിലാക്കിൾ തൊടുക ഉമ്മർകോയയുടെ (പി.ടി.ഉമ്മർകോയ) ജീവിതകഥയുടെ ‘ഓപ്പണിങ്’ ഇങ്ങനെയാണ്. ജോലിയിലിരിക്കെ ചതുരംഗക്കളി ആ ചെറുപ്പക്കാരനെ ആകർഷിച്ചു എന്നത് വിധിയുടെ മനോഹരമായ മറ്റൊരു കരുനീക്കം. സർവകലാശാലയിൽ ഇംഗ്ലിഷ് പഠിപ്പിക്കാൻ വന്ന മികച്ച ചെസ് താരം കൂടിയായ പ്രഫ. സി.എ.ഷെപ്പേഡിന്റെ പരിശീലനത്തിലായിരുന്നു തുടക്കം. അതിവേഗം മലപ്പുറം ജില്ലാ ചാംപ്യനായ ഉമ്മർകോയ പക്ഷേ അതിനെക്കാൾ മികവു തെളിയിച്ചതു സംഘാടനത്തിലാണ്. 

അദ്ദേഹം കേരള ചെസ് അസോസിയേഷൻ സെക്രട്ടറിയായതോടെ ഇരുട്ടു പുതച്ച ഹാളുകളിൽ മെഴുകുതിരി കത്തിച്ചു നടത്തിവന്ന സംസ്ഥാന ചാംപ്യൻഷിപ്പുകൾ പഴങ്കഥയായി.

ദേശീയ ചാംപ്യൻഷിപ്പുകൾക്ക് കോഴിക്കോട്ടെ ഹോട്ടലുകൾ അരങ്ങുകളായി. ജൂനിയർ ലോക ചാംപ്യൻഷിപ് വരെ ഉമ്മർകോയയുടെ പരിശ്രമത്തിൽ കോഴിക്കോടിന്റെ ആതിഥ്യം സ്വീകരിച്ചെത്തി. 

മാതാപിതാക്കളോടൊപ്പം കോഴിക്കോട്ടു വന്ന തമിഴ്നാട്ടുകാരനായ വിശ്വനാഥൻ ആനന്ദ് എന്ന പയ്യൻ ലോക ജൂനിയർ ചാംപ്യൻഷിപ് കിരീടം നേടുമ്പോൾ ആതിഥേയന്റെ വേഷത്തിലായിരുന്നു ഉമ്മർകോയ. പിന്നീട് ആനന്ദിന്റെ ഉയർച്ചകൾക്കെല്ലാം അദ്ദേഹം ആദ്യ സാക്ഷിയായി. ആനന്ദിന്റെ ആദ്യ ജീവചരിത്ര ഗ്രന്ഥം ഇംഗ്ലിഷിൽ രചിച്ചതും അദ്ദേഹംതന്നെ. 

1956ൽ രൂപംകൊണ്ട ഇന്ത്യൻ ചെസ് ഫെഡറേഷന്റെ സെക്രട്ടറിയായ ഉമ്മർകോയ ആർബിറ്ററായി പല രാജ്യങ്ങളിലുമെത്തി. കോമൺവെൽത്ത് ചെസ് അസോസിയേഷന്റെ സെക്രട്ടറിയാവുന്ന ആദ്യ മലയാളിയുമായി.

1996ൽ റഷ്യയിൽനിന്നുള്ള കിർസാൻ ഇല്യുഷനിനോവ് ലോക ചെസ് ഫെഡറേഷൻ (ഫിഡെ) പ്രസിഡന്റായപ്പോൾ അദ്ദേഹം വൈസ് പ്രസിഡന്റുമായി. കാലിക്കറ്റ് സർവകലാശാലയിൽ റഷ്യൻ ഭാഷ പഠിപ്പിക്കാൻ വന്ന വിദേശ വനിതയുടെ ശിക്ഷണത്തിൽ ആ ഭാഷ കൂടി സ്വായത്തമാക്കിയതിന്റെ ഫലം ലോകവേദികളിൽ അദ്ദേഹത്തെ തുണയ്ക്കുകയും ചെയ്തു. ഫിഡെ മത്സരങ്ങൾ ഇന്ത്യയിലേക്കു കൊണ്ടുവരാനായിരുന്നു അദ്ദേഹത്തിന്റെ പിന്നീടുള്ള ശ്രമങ്ങൾ. 

പിൽക്കാലത്ത് ചെസ് ഫെഡറേഷനിലുണ്ടായ അധികാര വടംവലികൾ ഉമ്മർകോയയെ കോടതി കയറ്റി. കോഴിക്കോട്ട് ആസ്ഥാനമായി പ്രവർത്തിച്ചിരുന്ന അഖിലേന്ത്യാ ചെസ് ഫെഡറേഷൻ അംഗീകാരം റദ്ദാക്കണമെന്നു കാട്ടി തമിഴ്നാടും മഹാരാഷ്ട്രയും ഡൽഹിയുമൊക്കെ ചേർന്ന് സമർപ്പിച്ച ഹർജികൾ അദ്ദേഹത്തെ വലച്ചു. ഇതിനിടയിൽ, രോഗബാധിതനാവുകയും ചെയ്തതോടെ പന്നിയങ്കരയിലെ നജു റിവാജ് എന്നു പേരുള്ള വസതിയിൽ വിശ്രമത്തിലായി അദ്ദേഹം. 

English Summary: PT Ummer Koya: The Malayalee Ambassador of Chess