ADVERTISEMENT

അമ്മയായതിനു ശേഷം കോർട്ടിലേക്ക് തിരിച്ചെത്തിയ പി.എസ്.ജീനയ്ക്ക് കേരള ഗെയിംസിൽ സ്വർണം 

തിരുവനന്തപുരം ∙ 10 മാസം പ്രായമുള്ള മകൻ ഡേവ് വീട്ടിൽ പിച്ചവച്ചു തുടങ്ങിയ സമയത്ത് അമ്മ ജീന ബാസ്കറ്റ്ബോൾ കോർട്ടിൽ നടത്തിയതു ഗംഭീര തിരിച്ചുവരവ്. 2 വർഷത്തെ ഇടവേളയ്ക്കുശേഷം മത്സരക്കളത്തിലേക്കു തിരിച്ചെത്തിയ രാജ്യാന്തര താരം പി.എസ്. ജീനയ്ക്ക് ആദ്യ ടൂർണമെന്റിൽതന്നെ സ്വർണത്തിളക്കം. ഈ നേട്ടം ഇന്നലെ, മാതൃദിനത്തിലായത് മറ്റൊരു അപൂർവതയുമായി. കേരള ഗെയിംസ് ബാസ്കറ്റ്‌ബോൾ ഫൈനലിൽ ജീനയുൾപ്പെട്ട തിരുവനന്തപുരം വനിതാ ടീം, തൃശൂരിനെ തോൽപിച്ച് ചാംപ്യൻമാരായി. ഫൈനലിൽ 19 പോയിന്റ് നേടി ജീന ഗംഭീരപ്രകടനം നടത്തുകയും ചെയ്തു.

നാലു തവണ ഇന്ത്യൻ ക്യാപ്റ്റനും തുടർച്ചയായി 8 വർഷം ഇന്ത്യൻ സീനിയർ ടീമിൽ അംഗവുമായിരുന്ന പി.എസ്.ജീന 2020 ഫെബ്രുവരിക്കുശേഷം പങ്കെടുത്ത ആദ്യ പ്രധാന ടൂർണമെന്റായിരുന്നു ഇത്. കഴിഞ്ഞ 11 വർഷത്തിനിടെ ജീനയില്ലാതെ കേരള ടീം ദേശീയ മത്സരത്തിനിറങ്ങിയത് ഒരേയൊരു തവണ. 2020 ജൂലൈയിലായിരുന്നു ചാലക്കുടി സ്വദേശി ജാക്സനുമായുള്ള വിവാഹം. പ്രസവത്തിനുശേഷം മൂന്നാം മാസം വീട്ടിൽ ബാസ്കറ്റ്ബോൾ‌ റിങ് സജ്ജീകരിച്ച് ജീന പരിശീലനം തുടങ്ങിയിരുന്നു. 2 മാസം കൂടി കഴിഞ്ഞ് ജിംനേഷ്യത്തിൽ പരിശീലനവും തുടങ്ങി. കെഎസ്ഇബി ടീമംഗമായ ജീന ടീമിനൊപ്പം ചേർന്ന് പരിശീലനം വീണ്ടും ആരംഭിച്ചത് രണ്ടുമാസം മുൻപാണ്.  അമ്മയെ കാണാൻ കുഞ്ഞ് ഡേവും ഇന്നലെ ഗാലറിയിലുണ്ടായിരുന്നു. മത്സരശേഷം, അമ്മ കഴുത്തിലണിഞ്ഞ സ്വർണമെഡൽ കൈപ്പിടിയിലൊതുക്കി ഡേവും ആ വിജയത്തിൽ പങ്കാളിയായി.  

English Summary: Basket ball palyer jeena won Gold medal

ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.
തൽസമയ വാർത്തകൾക്ക് മലയാള മനോരമ മൊബൈൽ ആപ് ഡൗൺലോഡ് ചെയ്യൂ
അവശ്യസേവനങ്ങൾ കണ്ടെത്താനും ഹോം ഡെലിവറി  ലഭിക്കാനും സന്ദർശിക്കു www.quickerala.com