കോവിഡ് കേസുകൾ വർധിച്ചു; ഏഷ്യൻ പാരാ ഗെയിംസും നീട്ടിവച്ച് ചൈന

ബെയ്ജിങ് ∙ ഏഷ്യൻ ഗെയിംസിനു പിന്നാലെ ചൈനയിൽ ഈ വർഷം നടക്കാനിരുന്ന ഏഷ്യൻ പാരാ ഗെയിംസും നീട്ടിവച്ചു. ഒക്ടോബർ 9 മുതൽ 15വരെ നടക്കാനിരുന്ന ഗെയിംസാണ് രാജ്യത്തു കോവിഡ് കേസുകൾ വർധിച്ചതിന്റെ പശ്ചാത്തലത്തിൽ നീട്ടിവച്ചത്. സെപ്റ്റംബർ 10 ന് ആരംഭിക്കേണ്ട ഏഷ്യൻ ഗെയിംസും കോവിഡിനെത്തുടർന്ന് ഈ മാസമാദ്യം ചൈന നീട്ടിവച്ചിരുന്നു. ഏഷ്യൻ ഗെയിംസ് വേദിയായ ചൈനീസ് നഗരം ഹാങ്ചൗവിൽ തന്നെയാണ് പാരാ ഗെയിംസും നടക്കാനിരുന്നത്. 

രണ്ടു ഗെയിംസുകളും 2023ൽ നടത്താനാണ് ആലോചന. തീയതി നീട്ടിയെങ്കിലും പാരാ ഗെയിംസിന്റെ ലോഗോ, ആപ്തവാക്യം എന്നിവയ്ക്കു മാറ്റമുണ്ടാകില്ല. രേഖകളിൽ 2022 എന്ന വർഷവും നിലനിർത്തും. 22 ഇനങ്ങളിലായി 4,000 കായിക താരങ്ങളാണ് ഏഷ്യൻ പാരാ ഗെയിംസിൽ മത്സരിക്കുന്നത്. 

English Summary: Hangzhou Asian Para Games postponed