ലോക സീനിയർ വനിതാ ബോക്സിങ് ചാംപ്യൻഷിപ് ഫൈനൽ ഇന്നും നാളെയും; മത്സരിക്കുന്നവരിൽ 4 ഇന്ത്യൻ താരങ്ങൾ

ന്യൂഡൽഹി ∙ ഇന്നും നാളെയുമായി നടക്കുന്ന ലോക സീനിയർ വനിതാ ബോക്സിങ് ചാംപ്യൻഷിപ് ഫൈനലിൽ സ്വർണ പ്രതീക്ഷയിൽ മത്സരിക്കുന്നത് 4 ഇന്ത്യൻ താരങ്ങൾ. നിതു ഗൻഖാസും സ്വീറ്റി ബുറയും ഇന്ന് ഇറങ്ങുമ്പോൾ നിഖാത് സരീനും ല‌വ്‌ലിന ബോർഗോഹെയ്നും നാളെ മത്സരിക്കും. 

ഏഷ്യൻ ചാംപ്യൻഷിപ്പിലെ വെങ്കല മെഡൽ ജേതാവ് മംഗോളിയയുടെ ലുട്സിക്കാൻ അൽറ്റെൻസെഗിനെയാണു 48 കിലോ വിഭാഗത്തിൽ നിതു നേരിടുന്നത്. 81 കിലോ വിഭാഗത്തിൽ സ്വീറ്റിയുടെ എതിരാളി ചൈനയുടെ വാങ് ലിനയാണ്. 2014 ലോക ചാംപ്യൻഷിപ്പിലെ വെള്ളി മെഡൽ ജേതാവാണ് ലിന.മേരികോമിനു ശേഷം ലോക ചാംപ്യൻഷിപ്പിൽ തുടർച്ചയായി രണ്ടു തവണ സ്വർണം നേടുന്ന താരമാകാനാണു നിഖാത് സരീൻ ഇറങ്ങുന്നത്.

 ഇരുപത്തിയാറുകാരിയായ നിഖാത് നാളെ നേരിടുക വിയറ്റ്നാം താരവും രണ്ടു തവണ ഏഷ്യൻ ജേതാവുമായ യുയെൻ തിതാമിനെയാണ്. ഒളിംപിക്സ് മെഡൽ ജേതാവ് ലവ്‍ലിന ഓസ്ട്രേലിയയുടെ കൈറ്റ്‌ലിൻ പാർക്കറെ  നേരിടും. സ്വർണമെഡൽ ജേതാക്കൾക്ക് ഏകദേശം 82 ലക്ഷം രൂപയാണ് (1 ലക്ഷം ഡോളർ) സമ്മാനമായി ലഭിക്കുക.

English Summary : Four Indian stars participate in world senior womens boxing championship final