ഒളിംപിക്സിൽ മത്സരിക്കുമ്പോൾ 7 മാസം ‌ഗർഭിണിയായിരുന്നെന്ന് ഈജിപ്ത് താരം; ഉള്ളിലൊരു തങ്കം!

പാരിസ് ∙ ഫെൻസിങ്ങിൽ ഒളിംപിക്സ് മെഡലിനായി പൊരുതുമ്പോൾ നദ ഹഫീസിന്റെയുള്ളിൽ മറ്റൊരു ജീവൻകൂടി തുടിച്ചിരുന്നു! തിങ്കളാഴ്ച വനിതാ ഫെൻസിങ് സാബ്‍റെ ഇനത്തിൽ പ്രീക്വാർട്ടറിലെത്തി കരിയറിലെ മികച്ച നേട്ടം കൈവരിച്ച ഈജിപ്തിന്റെ വനിതാ താരമാണ് താൻ 7 മാസം ഗർഭിണിയാണെന്ന വെളിപ്പെടുത്തലിലൂടെ കായികലോകത്തെ അമ്പരപ്പിച്ചത്.

' മത്സരവേദിയിൽ എന്നെയും എതിരാളിയെയും മാത്രമാണ് നിങ്ങൾ കണ്ടിട്ടുണ്ടാകുക. പക്ഷേ ശരിക്കും 3 പേരുണ്ടായിരുന്നു. ഇനിയും ഈ ലോകത്തേക്ക് എത്താത്ത എന്റെ കുഞ്ഞും അവിടെ എനിക്കൊപ്പമുണ്ടായിരുന്നു' – നദ ഇൻസ്റ്റഗ്രാമിൽ കുറിച്ചു. ഇരുപത്താറുകാരിയുടെ മൂന്നാം ഒളിംപിക്സായിരുന്നു പാരിസിലേത്. ഒളിംപിക്സിൽ നദയുടെ ഏറ്റവും മികച്ച പ്രകടനവും ഇത്തവണയാണ്.