ലോക ചെസ് ചാംപ്യൻഷിപ്: മൂന്നാം ഗെയിമിൽ തിരിച്ചടിച്ച് ഇന്ത്യൻ താരം ഗുകേഷ്, വിജയത്തോടെ ഡിങ് ലിറനൊപ്പം

സിംഗപ്പുർ∙ ലോക ചെസ് ചാംപ്യൻഷിപ്പിലെ മൂന്നാം കളിയിൽ നിലവിലെ ചാംപ്യനായ ചൈനയുടെ ഡിങ് ലിറനെ വീഴ്ത്തി ഇന്ത്യയുടെ ദൊമ്മരാജു ഗുകേഷ്. ഇതോടെ ഇരുവർക്കും 1.5 പോയിന്റ് വീതമായി. 14 ഗെയിമുകളുള്ള ചാംപ്യൻഷിപ്പിൽ ആദ്യം 7.5 പോയിന്റ് നേടുന്നയാൾക്കാണ് കിരീടം. 

ആദ്യ കളിയിൽ ഗുകേഷിനെ 43 നീക്കങ്ങളിൽ തോൽപിച്ച് ചൈനയുടെ ഡിങ് ലിറൻ ലീഡ് (1–0) നേടിയിരുന്നു. ക്ലാസിക്കൽ ചെസിൽ ലോക ചാംപ്യനായ ഡിങ് ലിറൻ ജയിക്കുന്നത് 304 ദിവസം നീണ്ട സുദീർഘമായ ഇടവേളയ്ക്കു ശേഷമായിരുന്നു. രണ്ടാം കളിയിൽ ഗുകേഷും ഡിങ് ലിറനും സമനിലയിൽ പിരിഞ്ഞു. 23 നീക്കങ്ങൾക്കൊടുവിലാണ് ഇരുവരും സമനിലയ്ക്ക് കൈകൊടുത്തത്.