ADVERTISEMENT

സ്വർണ മത്സ്യമായി ഹർഷിത ജയറാം കുതിച്ചപ്പോൾ ദേശീയ ഗെയിംസ് നീന്തൽക്കുളത്തിൽനിന്ന് കേരളത്തിന് ആദ്യ സ്വർണം. വനിതകളുടെ 200 മീറ്റർ ബ്രസ്റ്റ് സ്ട്രോക്ക് നീന്തലിലാണ് തൃശൂർ മതിലകം സ്വദേശിയായ ഹർഷിത ജയറാം സ്വർണം നേടിയത് (2:42.38 മിനിറ്റ്). തമിഴ്നാടിന്റെ ശ്രീനിധി നടേശനെ 6 സെന്റി സെക്കൻഡ് വ്യത്യാസത്തിൽ പിന്തള്ളിയാണ് ഹർഷിതയുടെ നേട്ടം. 2 ദേശീയ ഗെയിംസുകളിലായി ഹർഷിതയുടെ അഞ്ചാം മെഡലാണിത്. അതിൽ 3 സ്വർണം. കഴിഞ്ഞ തവണത്തെ ദേശീയ ഗെയിംസിൽ 50 മീ, 200 മീ. ബ്രസ്റ്റ് സ്ട്രോക്കുകളിൽ ഹർഷിത സ്വർണം നേടിയിരുന്നു. ഈ ഗെയിംസിൽ ഹർഷിതയ്ക്ക് ഇനി 3 ഇനങ്ങൾ കൂടി ബാക്കിയുണ്ട്.

തൃശൂർ മതിലകം സ്വദേശി ജയറാമിന്റെയും മമതയുടെയും മകളായ ഹർഷിത ജനിച്ചതും വളർന്നതും ബെംഗളൂരുവിലാണ്. ഇപ്പോൾ റെയിൽവേയിൽ സീനിയർ ടിക്കറ്റ് എക്സാമിനർ. ബെംഗളൂരു ഗ്ലോബൽ സ്വിം സെന്ററിൽ കണ്ണൂർ സ്വദേശിയായ കോച്ച് എ.സി. ജയരാജിനു കീഴിലാണു പരിശീലനം.സഹോദരി അശ്വിനിക്കൊപ്പം 8 വയസ്സു മുതൽ നീന്തൽ പരിശീലിക്കാൻ തുടങ്ങിയതാണു ഹർഷിത. സജൻ പ്രകാശാണു ഹർഷിതയുടെ റോൾ മോഡൽ. 

നിതകളുടെ 45 കിലോഗ്രാം വിഭാഗം വെയ്റ്റ്‌ലിഫ്റ്റിങ്ങിൽ മത്സരിക്കുന്ന കേരളത്തിന്റെ സുഫ്ന ജാസ്മിൻ. സുഫ്ന സ്വർണം നേടി.
നിതകളുടെ 45 കിലോഗ്രാം വിഭാഗം വെയ്റ്റ്‌ലിഫ്റ്റിങ്ങിൽ മത്സരിക്കുന്ന കേരളത്തിന്റെ സുഫ്ന ജാസ്മിൻ. സുഫ്ന സ്വർണം നേടി.

കേരളത്തിന്റെ മറ്റു വിജയങ്ങൾ

∙ പുരുഷ ഫുട്ബോൾ: ആദ്യ ഗ്രൂപ്പ് മത്സരത്തിൽ കേരളം 1–0ന് മണിപ്പുരിനെ തോൽപിച്ചു. 53–ാം മിനിറ്റിൽ ബിബിൻ ബോബനാണ് ഗോൾ നേടിയത്. 

∙ ബീച്ച് ഹാൻഡ്ബോൾ: സെമിയിൽ അസമിനെ പെനൽറ്റി ഷൂട്ടൗട്ടിൽ തോൽപിച്ച കേരള വനിതകൾ ഫൈനലിൽ കടന്നു. പെനൽറ്റി ഷൂട്ടൗട്ടിൽ ഗോൾകീപ്പർ ഐശ്വര്യ കേരളത്തിന്റെ രക്ഷകയായി. ശ്വാസ തടസ്സവും ആരോഗ്യ പ്രശ്നങ്ങളും കാരണം ആശുപത്രിയിൽ നിന്നാണ് ഐശ്വര്യ സെമിഫൈനൽ മത്സരത്തിനെത്തിയത്.

∙ ബാസ്കറ്റ്ബോൾ (5x5): വനിതകളിൽ തുടർച്ചയായ രണ്ടാം വിജയവുമായി കേരളം സെമി ഫൈനലിൽ കടന്നു.  ഉത്തരാഖണ്ഡിനെ തോൽപിച്ചത് 90–40 എന്ന സ്കോറിൽ. 

∙ വോളിബോൾ: വനിത, പുരുഷ വിഭാഗങ്ങളിൽ കേരളത്തിനു ജയം. വനിതകൾ തമിഴ്നാടിനെയും (3–1), പുരുഷൻമാർ ഹരിയാനയെയും (3–1) തോൽപിച്ചു. 

∙ വാട്ടർപോളോ: പുരുഷ വിഭാഗം വാട്ടർപോളോയിൽ ആദ്യ മത്സരത്തിൽ കേരളം മണിപ്പുരിനെ തോൽപിച്ചു (20–0).

∙ ഖൊഖൊ: പുരുഷ ഖൊഖൊയിൽ കേരളം സെമിയിൽ കടന്നു. ക്വാർട്ടറിൽ കർണാടകയെ തോൽപിച്ചു (30–26). 

English Summary:

Harshitha Jayaram wins gold for Kerala in swimming at the National Games, securing the state's first gold in the event.

ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.
തൽസമയ വാർത്തകൾക്ക് മലയാള മനോരമ മൊബൈൽ ആപ് ഡൗൺലോഡ് ചെയ്യൂ
അവശ്യസേവനങ്ങൾ കണ്ടെത്താനും ഹോം ഡെലിവറി  ലഭിക്കാനും സന്ദർശിക്കു www.quickerala.com