സൂപ്പർ സ്പെയിൻ, സൂപ്പർ നദാൽ; സ്പെയിന് 6–ാം ഡേവിസ് കപ്പ് കിരീടം
Mail This Article
മഡ്രിഡ് ∙ ലോക ഒന്നാം നമ്പർ താരം റാഫേൽ നദാലിന്റെ ഉജ്വല പ്രകടനത്തിന്റെ മികവിൽ സ്പെയിനിന് 6–ാം ഡേവിസ് കപ്പ് കിരീടം. കാനഡയുമായുള്ള ഫൈനലിലെ നിർണായക മത്സരത്തിൽ നദാൽ 6–3, 7–6 (9–7)ന് ഡെനിസ് ഷാപ്പലോവിനെ കീഴടക്കി. ആദ്യ മത്സരത്തിൽ റോബർട്ടോ ബാറ്റിസ്റ്റ അഗൂട്ട് 7–6 (7–3), 6–3ന് ഫെലിക്സ് ഓഗർ അലിയാസിമിനെ തോൽപിച്ചിരുന്നു.
ഒന്നാം നമ്പർ സ്ഥാനം തിരിച്ചുപിടിക്കുകയും 2 ഗ്രാൻസ്ലാം കിരീടം ഉൾപ്പെടെ ഒട്ടേറെ മികച്ച ജയങ്ങൾ സ്വന്തമാക്കുകയും ചെയ്ത് നദാൽ ഈ വർഷം തന്റെ കരിയറിൽ അവിസ്മരണീയമാക്കി. മാതൃരാജ്യത്തിന് ഒരിക്കൽ കൂടി ഡേവിസ് കപ്പ് നേടിക്കൊടുത്ത് നേട്ടത്തിനു തിളക്കം കൂട്ടുകയും ചെയ്തു.
നദാലിന്റെ 4–ാം ഡേവിസ് കപ്പ് കിരീടമാണിത്. കഴിഞ്ഞയാഴ്ച നദാൽ കളിച്ച 8 കളിയിലും ജയം കണ്ടു. ബ്രിട്ടനെതിരായ സെമിയിൽ നദാലിന്റെ മികവാണു സ്പെയിനു തുണയായത്.
∙ മടക്കിക്കൊടുക്കാൻ ഇനി ഒന്നും എന്നിൽ ബാക്കിയില്ല. എതിരാളി ഏറെ കരുത്തനായിരുന്നു. ജയിക്കാൻ എന്റെ എല്ലാ കഴിവും പുറത്തെടുക്കേണ്ടി വന്നു.
ഏറെ വിഷമകരമായ ആഴ്ചയാണു കടന്നുപോയത്. എന്നിലുള്ള മുഴുവൻ ഊർജവും വിനിയോഗിച്ച് പൂർണമായും തളർന്നു. കരിയറിലെ ഏറ്റവും സംതൃപ്ത വർഷമാണിത്.
∙ റാഫേൽ നദാൽ (ഡേവിസ് കപ്പ് കിരീട വിജയശേഷം)