കളിയല്ലിത്, കാരുണ്യം!

മഡ്രിഡ് ∙ റാക്കറ്റില്ലാതെ വീട്ടിലിരുന്നു ടെന്നിസ് കളിച്ചു നേടിയ സമ്മാനത്തുക മുഴുവനും കോവിഡ് പ്രതിരോധത്തിനു നൽകി ബ്രിട്ടന്റെ ആൻഡി മറെയും നെതർലൻഡ്സിന്റെ വനിതാ താരം കികി ബെർട്ടൻസും. പുരുഷ, വനിതാ വിഭാഗങ്ങളിലായി മഡ്രിഡ് ഓപ്പൺ വെർച്വൽ ടെന്നിസ് കിരീടം നേടിയ ഇരുവർക്കും സമ്മാനത്തുകയായി ലഭിച്ചത് 45,000 യൂറോ വീതമാണ് (ഏകദേശം 37 ലക്ഷം രൂപ).  വിഡിയോ ഗെയിമായി നടത്തിയ മഡ്രിഡ് ഓപ്പൺ ഫൈനലിൽ ബൽജിയത്തിന്റെ ഡേവിഡ് ഗോഫിനെയാണു മറെ കീഴടക്കിയത് (7-6). വനിതാവിഭാഗത്തിൽ നിലവിലെ ചാംപ്യൻ കികി ബെർട്ടൻസിനു വെർച്വൽ പോരാട്ടത്തിലും കിരീടം നിലനിർത്താനായി.