സാംപ്രസിനൊപ്പം ജോക്കോവിച്ച്

ലണ്ടൻ ∙ പുരുഷ ടെന്നിസിലെ ലോക ഒന്നാം നമ്പർ പദവി വർഷാവസാനം നിലനിർത്തുന്നതിൽ പീറ്റ് സാംപ്രസിന്റെ നേട്ടത്തിനൊപ്പമെത്തി സെർബിയയുടെ നൊവാക് ജോക്കോവിച്ച്. ഈ വർഷാവസാനം ഒന്നാം സ്ഥാനത്തു തുടരുന്നതോടെ ജോക്കോവിച്ച് 6–ാം തവണയാണ് ഈ നേട്ടത്തിലെത്തുക.

അടുത്തയാഴ്ച ബൾഗേറിയയിൽ തുടങ്ങുന്ന എടിപി ടൂറിൽനിന്നു 2–ാം നമ്പർ റാഫേൽ നദാൽ പിൻമാറിയതോടെയാണു ജോക്കോവിച്ച് ഒന്നാം നമ്പർ സ്ഥാനം വർഷാവസാനം ഉറപ്പാക്കിയത്. അടുത്തയാഴ്ച ഒന്നാം റാങ്കിൽ ജോക്കോവിച്ച് 294–ാമത്തെ ആഴ്ച പൂർത്തിയാക്കും. 310 ആഴ്ച ഒന്നാം നമ്പർ പദവി കയ്യിൽവച്ച റോജർ ഫെഡററാണ് ആ നേട്ടത്തിൽ മുന്നിലുള്ളത്. സാംപ്രസ് 286 ആഴ്ചയേ ഒന്നാം റാങ്കിലിരുന്നിട്ടുള്ളൂ.