300–ാം ജയം; നദാൽ മുന്നോട്ട്: ഡബിൾസിൽ ബൊപ്പണ്ണ സഖ്യം പ്രീക്വാർട്ടറിൽ
Mail This Article
പാരിസ് ∙ ഗ്രാൻസ്ലാം ടെന്നിസിലെ 300–ാം മത്സരവിജയത്തിന്റെ തിളക്കത്തോടെ സ്പാനിഷ് സൂപ്പർതാരം റാഫേൽ നദാൽ ഫ്രഞ്ച് ഓപ്പൺ ടെന്നിസിന്റെ മൂന്നാം റൗണ്ടിൽ. ഫ്രഞ്ച് താരം കൊറെയ്ൻ മോടെറ്റിനെ അനായാസം തോൽപിച്ചാണ് (6-3, 6-1, 6-4) നദാലിന്റെ മുന്നേറ്റം. പുരുഷൻമാരിൽ രണ്ടാം സീഡ് റഷ്യയുടെ ഡാനിൽ മെദ്വദേവ്, മരിൻ സിലിച്ച് എന്നിവരും മൂന്നാം റൗണ്ടിലെത്തി.
വനിതകളിൽ ലോക ഒന്നാം നമ്പർ താരം ഇഗ സ്യാംതെക് അപരാജിത കുതിപ്പ് തുടർന്നു. രണ്ടാംറൗണ്ടിൽ യുഎസ് താരം അലിസൻ റിക്കെയെ തോൽപിച്ച ഇഗ (6-0, 6-2) പരാജയമറിയാതെയുള്ള തുടർച്ചയായ 30–ാം മത്സരമാണ് ഇന്നലെ പൂർത്തിയാക്കിയത്. വനിതകളിൽ മൂന്നാം സീഡ് സ്പെയിനിന്റെ പൗള ബഡോസ, മാഡിസൻ കീസ് എന്നിവരും മൂന്നാം റൗണ്ടിലെത്തി. എട്ടാം സീഡ് കരോലിന പ്ലിസ്കോവയെ ഫ്രഞ്ച് താരം ലിയോലിയ അട്ടിമറിച്ചു (6-2, 6-2). പുരുഷ ഡബിൾസിൽ ഇന്ത്യയുടെ രോഹൻ ബൊപ്പണ്ണ – ഡച്ച് താരം മെഡെയ്ൻ കൂപ്പ് സഖ്യം പ്രീക്വാർട്ടറിലെത്തി.
English Summary: French Open: Rafael Nadal becomes third man to win 300 Grand Slam singles matches