ടെന്നിസ് വിടില്ല: ഫെഡറർ
Mail This Article
ലണ്ടൻ∙ പ്രഫഷനൽ കരിയറിൽ നിന്നു വിരമിച്ചാലും താൻ ടെന്നിസ് രംഗത്തുണ്ടാകുമെന്ന് സ്വിസ് താരം റോജർ ഫെഡറർ. ഏതു മേഖലയിലാണ് പ്രവർത്തിക്കുകയെന്നു തീരുമാനിച്ചിട്ടില്ലെന്നും അതിനെക്കുറിച്ചുള്ള ചിന്തയിലാണെന്നും ഫെഡറർ പറഞ്ഞു. തന്റെ വിടവാങ്ങൽ മത്സരമായ ലേവർ കപ്പ് ടൂർണമെന്റിന് മുന്നോടിയായി മാധ്യമങ്ങളോട് സംസാരിക്കുകയായിരുന്നു ഇതിഹാസ താരം. ലണ്ടനിൽ നാളെയാണു ലേവർ കപ്പിന് തുടക്കം. 25 വരെയാണ് ടൂർണമെന്റ്.
‘ടെന്നിസ് എനിക്കു തന്നത് അത്രയേറെ സൗഭാഗ്യങ്ങളാണ്. 26–ാം വയസ്സിൽ ടെന്നിസിനോടു വിടപറഞ്ഞ ശേഷം കാൽ നൂറ്റാണ്ട് വിമ്പിൾഡനിലേക്കു തിരിഞ്ഞു നോക്കാതിരുന്ന ഇതിഹാസ താരം ബ്യോൺ ബോർഗിനെപ്പോലെയാകാൻ എനിക്കു കഴിയില്ല. എന്നെ നിങ്ങൾക്കു ടെന്നിസ് പരിസരങ്ങളിൽത്തന്നെ ഇനിയും കാണാം– ഫെഡറർ പറഞ്ഞു.
നാളെ ആരംഭിക്കുന്ന ലേവർ കപ്പ് ടൂർണമെന്റിൽ റെസ്റ്റ് ഓഫ് ദ് വേൾഡിനെതിരെ യൂറോപ്പിനു വേണ്ടിയാണ് ഫെഡറർ അവസാനമായി റാക്കറ്റേന്തുക. സ്പാനിഷ് താരം റാഫേൽ നദാലിനൊപ്പം ഫെഡറർ ഡബിൾസ് മത്സരത്തിൽ ഇറങ്ങുമെന്നാണ് പ്രതീക്ഷ.
Content Highlight: Roger Federer on Tennis career